Qyrǵyzstanda prezıdent jáne parlament saılaýyn ótkizý erejesi ózgerdi
ASTANA. KAZINFORM — Qyrǵyzstan Prezıdenti Sadyr Japarov prezıdent pen Jogorký Keńesh depýtattaryn saılaý týraly zańnamaǵa ózgerister engizetin konstıtýtsııalyq zańǵa qol qoıdy, dep habarlaıdy Kabar.
Qujatta saılaý ótkizýdiń jańa merzimderi belgilenip, saılaý protsesin uıymdastyrý tártibine birqatar ózgeris engizildi.
Konstıtýtsııalyq zańdy Jogorký Keńesh 2026 jylǵy 24 maýsymda qabyldaǵan. Qujattyń maqsaty — Qyrǵyz Respýblıkasynyń saılaý zańnamasyn jetildirý.
Zańǵa sáıkes, Qyrǵyzstandaǵy kezekti prezıdent saılaýy endi prezıdenttiń ókilettik merzimi aıaqtalatyn jyldyń qańtar aıynyń tórtinshi sársenbisinde ótedi. Osylaısha, kezekti prezıdent saılaýy 2027 jylǵy 27 qańtarda ótpek.
Al Jogorký Keńesh depýtattarynyń kezekti saılaýy qazirgi shaqyrylymnyń konstıtýtsııalyq ókilettik merzimi aıaqtalatyn aıdyń sársenbi kúni uıymdastyrylady.
Sondaı-aq prezıdent jáne parlament saılaýy ótetin kúnder demalys kúni bolyp esepteledi.
Bul kúni jumys isteıtin azamattardyń jalaqysy jumys kúni retinde tolyq saqtalady.
Budan bólek, zańmen birqatar jańa talap engizildi. Atap aıtqanda, «saılaý mekenjaıy» ınstıtýty alynyp tastalady, bir saılaý ýchaskesindegi saılaýshylar sany, ádette, 4 myń adamnan aspaýǵa tıis.
Prezıdenttikke úmitkerler men kandıdat usynatyn saıası partııalar qujattaryn tapsyrmas buryn ózderiniń saılaý qoryn qurýǵa mindetti. Saılaý jarnasy tek osy qordyń qarajaty esebinen tólenedi.
Sonymen qatar kandıdattar men partııalarǵa árbir saılaý ýchaskesinde úsh adamnan aspaıtyn úgitshini jaldaýǵa ruqsat beriledi.
Taǵy bir jańalyq — kandıdattardy qoldaý úshin qol jınaý tsıfrlyq qoltańbany paıdalaný arqyly elektrondy formatta nemese qaǵaz qol qoıý paraqtary arqyly júrgizilýi múmkin.
Konstıtýtsııalyq zań resmı jarııalanǵan kúnnen bastap kúshine endi.
Aıta ketelik Qyrǵyzstan áýe kompanııalaryna habarlandyrýdy qyrǵyz tilinde jarııalaýdy buıyrdy.
