Qyrǵyzstanda janarmaıdyń rezervtik qoryn saqtaıtyn munaı qoımalary salynady
ASTANA. KAZINFORM — Qyrǵyzstanda janarmaı jetkizilimi úzilgen jaǵdaıda eldegi qordy qamtamasyz etý úshin arnaıy munaı qoımalaryn salý josparlanyp otyr. Sonymen qatar eldegi eki iri munaı óńdeý zaýytyn jańǵyrtý jumystary júrgizilip jatyr, dep habarlaıdy Kazinform Azertadj saıtyna silteme jasap.
Bul týraly Qyrǵyzstan Ekonomıka jáne kommertsııa mınıstrligi janyndaǵy Monopolııaǵa qarsy retteý qyzmetiniń retteletin salalardy basqarý bóliminiń meńgerýshisi Larısa Shýstıkova málimdedi.
Onyń aıtýynsha, munaı qoımalaryn salý syrtqy faktorlardyń ishki janar-jaǵarmaı naryǵyna áserin azaıtýǵa baǵyttalǵan sharalardyń biri bolmaq.
Sonymen birge Qyrǵyzstan munaı ónimderin ishki óndiris kólemin arttyrýdy kózdep otyr. Osy maqsatta eldegi eki iri munaı óńdeý zaýyty jańǵyrtylyp jatyr.
Jańǵyrtý jumystary aıaqtalǵannan keıin kásiporyndardyń óndiristik qýaty artyp, óndiriletin benzınniń sapasy K5 ekologııalyq klasyna deıin kóterilmek.
Eske salaıyq, buǵan deıin Qyrǵyzstan EAEO-ǵa múshe memleketter aýmaǵynan taýarlar men kólik quraldaryn qajetti qujattarsyz shekara arqyly ótkizgeni úshin aıyppuldardy kóbeıtkenin habarlaǵanbyz.
