Qyrǵyzstanda janar-jaǵarmaı materıaldaryna qatysty jaǵdaı turaqtandy

BІShKEK. KAZINFORM – Eldegi barlyq munaı bazalarynda qajetti janar-jaǵarmaı qory bar, dep habarlaıdy Kazinform menshikti tilshisi.

Bul týraly Qyrǵyzstan Respýblıkasy Mınıstrler kabıneti tóraǵasynyń orynbasary – Sý resýrstary, aýyl sharýashylyǵy jáne óńdeý ónerkásibi mınıstri Baqyt Torobaev habarlady.

Onyń aıtýynsha, Mınıstrler kabıneti eldiń munaı treıderlerimen birlesip Qazaqstan, Ázerbaıjan jáne Belarýstegi memlekettik organdarmen jáne munaı óńdeý zaýyttarymen kelissóz júrgizýi nátıjesinde Qyrǵyzstanǵa munaı ónimderin jetkizý júzege asyrylyp jatyr.

- Eldi janar-jaǵarmaı materıaldarymen qamtamasyz etý jumystary tıisti memlekettik organdardyń kúndelikti baqylaýynda, jaǵdaı turaqtandy, - dep atap ótti ol.

Memlekettik organdar, jergilikti bılik organdary jáne tıisti kompanııalardyń basshylaryna halyq pen áleýmettik nysandar úshin janar-jaǵarmaı materıaldary men kómirdiń jetkilikti qorynyń bolýyn kún saıyn qadaǵalaý, baǵalar men sapa monıtorıngin júrgizý, sondaı-aq jylý men elektr energııasymen úzdiksiz jabdyqtaýdy kúsheıtilgen rejımde qamtamasyz etý tapsyryldy.

Buǵan deıin Qyrǵyzstanda janar-jaǵarmaı qory azaıyp, baǵa ósýi múmkin ekenin jazǵan edik.