Qyrǵyzstanda jańa daýys berý júıesi synaqtan ótedi
ASTANA.KAZINFORM - Qyrǵyzstandaǵy barlyq saılaý ýchaskelerinde qashyqtan daýys berýge arnalǵan jańa jabdyq qoldanylyp, testilik daýys berý júrip jatyr, dep habarlaıdy Kazinform agenttiginiń menshikti tilshisi.
Qashyqtan daýys berý 30 qarashada ótetin kezekten tys parlament saılaýy úshin saılaý protsesi jańashyldyqtarynyń biri bolmaqshy.
20 qazanda Bishkekte úsh qashyqtan daýys berý pýnkti ashyldy: «Dordoı» bazary (Alqan bazary), Asia Mall jáne Dordoı Plaza.
Qyrǵyz Respýblıkasynyń Ortalyq saılaý komıssııasy saılaý protsesiniń barlyq qatysýshylaryn 2025 jyldyń 10 qazanynda ótkizilgen jáne 2025 jyldyń 30 qazanyna josparlanǵan testilik daýys berýge qatysýǵa shaqyrady.
Saılaýshylarǵa barynsha qolaıly jaǵdaı jasaý úshin qashyqtan daýys berý júıesi qoldanylyp jatyr. Saılaýshylar tizimine engizilgen azamattar turaqty tirkeýge kele almasa, óz okrýginen tys nemese sheteldegi kez kelgen saılaý ýchaskesinde bıýrokratııalyq kedergisiz daýys bere alady. Basty maqsat – azamattardyń saılaý quqyqtaryn júzege asyrýyn qamtamasyz etý. Qashyqtan daýys berý de saılaýshylardyń belsendiligin arttyrýǵa yqpal etedi.
Esterińizge sala keteıik, qyrkúıekte Qyrǵyzstan Respýblıkasy Jogorký Keneshi (parlament) depýtattarynyń bastamashyl toby parlamentti ózin-ózi taratýdy, sodan keıin merziminen buryn saılaý ótkizýdi talap etken bolatyn. 25 qyrkúıekte parlament ózin-ózi merziminen buryn taratý týraly qaýly qabyldady. Qyrǵyz Respýblıkasy Prezıdentiniń 30 qyrkúıektegi jarlyǵymen Jogorký Kenesh (Parlament) depýtattarynyń kezekten tys saılaýy 2025 jylǵy 30 qarasha, jeksenbige belgilendi.
Qyrǵyzstan prezıdenti Sadyr Japarov halyqqa joldaýynda parlamenttik saılaýdy jeke ózi baqylaýǵa nıetti ekenin málimdedi.
1 qazandaǵy jaǵdaı boıynsha elde 4 287 000 saılaýshy tirkelip, aldaǵy Jogorký Kenesh saılaýyna qatysý quqyǵyna ıe boldy. Úsh saıası partııa kezekten tys parlamenttik saılaýǵa qatysýǵa ótinish berdi.
Buǵan deıin 2025 jyldyń maýsymynda elde Jogorký Kenesh (parlament) depýtattaryn saılaý tártibine ózgerister engizetin konstıtýtsııalyq zań qabyldanǵan bolatyn.
Qyrǵyzstandaǵy parlamenttik saılaýǵa qaı partııalar qatysýǵa nıetti.