Qyrǵyzstanda zańsyz qoqys úıindilerine aıyppul salý usynyldy

Tıisti zań jobasy qoǵamdyq talqylaýǵa shyǵaryldy.

Usynylyp otyrǵan ózgerister qoqyspen jumys isteý salasyndaǵy quqyq buzýshylyqtardyń aldyn alý tıimdiligin arttyrýǵa, zańsyz qoqys oryndarynyń sanyn azaıtýǵa, avtomobıl joldary men tabıǵı týrıstik nysandardyń sanıtarlyq jáne ekologııalyq jaǵdaıyn jaqsartýǵa, sondaı-aq qoqysty basqarý talaptaryn saqtaýǵa jaýapkershilikti kúsheıtýge baǵyttalǵan.

Qujatqa sáıkes, mynadaı sharalar qarastyrylǵan:

• Zańsyz qoqys úıindisin uıymdastyrǵany úshin 20 saǵatqa deıin qoǵamdyq jumysqa tartý nemese jeke tulǵalarǵa 10 myń som (50,5 myń teńge), zańdy tulǵalarǵa 23 myń som (116 myń teńgeden astam) aıyppul salý usynylady;

• Osy quqyq buzýshylyq bir jyl ishinde qaıtalansa, 20-dan 40 saǵatqa deıin qoǵamdyq jumysqa tartý nemese jeke tulǵalarǵa 20 myń som (101 myń teńge), zańdy tulǵalarǵa 65 myń som (328 myń teńgeden astam) aıyppul salý kózdelgen;

• Avtomobıl joldaryna qoqys tastaǵany, sonyń ishinde kólik qozǵalysy kezinde, qoqys pen ózge de zattardy úıgeni nemese órtegeni úshin jeke tulǵalarǵa 5,5 myń somnan (27 myń teńgeden astam) aıyppul salý usynylady;

• Týrıstik resýrs sanalatyn tabıǵı nysandarda belgilenbegen jerlerge qoqys tastaǵany, úıgeni nemese órtegeni úshin 20 saǵatqa deıin qoǵamdyq jumysqa tartý nemese jeke tulǵalarǵa 5,5 myń som (27 myń teńgeden astam), zańdy tulǵalarǵa 17 myń som (86 myń teńgege jýyq) aıyppul salý qarastyrylǵan;

• Bir jyl ishinde quqyq buzýshylyq qaıtalansa, 20-dan 40 saǵatqa deıin qoǵamdyq jumysqa tartý nemese jeke tulǵalarǵa 10 myń som (50,5 myń teńge), zańdy tulǵalarǵa 23 myń som (116 myń teńgeden astam) aıyppul salý usynylady.

Eske salaıyq, buǵan deıin Qyrǵyzstan EAEO-ǵa múshe memleketter aýmaǵynan taýarlar men kólik quraldaryn qajetti qujattarsyz shekara arqyly ótkizgeni úshin aıyppuldardy kóbeıtkenin habarlaǵan edik.