Qyrǵyzstanda vızasyz júrýge qatysty jańa erejeler kúshine endi
ASTANA. KAZINFORM — Qyrǵyzstanda shetel azamattary men azamattyǵy joq adamdardyń el aýmaǵynda bolý tártibi ózgerdi. Bul týraly Qyrǵyzstandaǵy Kazinform agenttiginiń menshikti tilshisi habarlady.
Tıisti qaýlyǵa Qyrǵyzstan mınıstrler kabınetiniń tóraǵasy 2026 jylǵy 7 qyrkúıekte qol qoıǵan.
Kóshi-qon zańnamasyndaǵy negizgi ózgerister:
-
Qyrǵyzstan aýmaǵynda belgilengen bolý merziminen asyp ketken shetel azamattaryna elge qaıta kirýge tyıym salynady. Tyıym merzimi olardyń vızasyz bolý merzimine teń bolady;
-
Shetel azamattarynyń elde bolǵan merzimi TMEBT avtomattandyrylǵan júıesi arqyly esepteledi. Bul rette azamattyń Qyrǵyzstannan keıingi ret shyqqan kúni onyń elde bolǵan aldyńǵy merzimi aıaqtalǵan kún retinde esepke alynady;
-
Qyrǵyzstan azamattarynyń sheteldik jubaılary men kámeletke tolmaǵan balalary elde qajetti ruqsat qujattaryn rásimdemeı, belgilengen merzimnen asyp ketken jaǵdaıda, mártebesin zańdastyrý úshin elge bir ret kirip, kelgen kúnnen bastap 30 jumys kúni ishinde qajetti rásimderdi júrgizýge múmkindik alady. Týystyq baılanys qujat júzinde rastalýǵa tıis;
-
Qyrǵyzstan aýmaǵynda belgilengen merzimnen kóbirek bolǵan shetel azamaty zańnamada belgilengen tártippen turýǵa yqtııarhat alý týraly ótinish bere alady.
Eske salaıyq, buǵan deıin Qyrǵyzstannyń Syrtqy kóshi-qon týraly zańyna bıýrokratııalyq kedergilerdi joıýǵa jáne sheteldikterdiń turýǵa ruqsat alý merzimin qysqartýǵa baǵyttalǵan túzetýler usynylǵan edi.
Sondaı-aq Qyrǵyzstanda joldar men qoǵamdyq oryndardaǵy qaıyr suraýshylyqpen kúresýge, sondaı-aq osal toptardy osyndaı áreketterge tartýdan qorǵaýǵa baǵyttalǵan zańǵa qol qoıyldy.
Quqyqbuzýshylyqtar týraly kodeks pen syrtqy kóshi-qon týraly zańǵa engizilgen ózgeristerge sáıkes, shetel azamattaryna qaıyr suraǵany úshin jaýapkershilik qarastyrylǵan. Qaıtalanǵan quqyqbuzýshylyq nemese bir aı ishinde osyndaı áreketke tartý deregi anyqtalǵan jaǵdaıda, olar Qyrǵyzstan aýmaǵynan shyǵarylady.
