Qyrǵyzstanda valıýta aıyrbastaý kezinde klıentterdi tekserý talaptary kúsheıtildi
ASTANA. KAZINFORM — Qyrǵyzstanda qolma-qol shetel valıýtasymen operatsııalar júrgizý tártibi jańartyldy. Ózgerister klıentterdi sáıkestendirý, qujattardy tekserý jáne iri kólemdegi valıýtalyq operatsııalardy baqylaý talaptaryna qatysty.
Tıisti ózgerister Qyrǵyz Respýblıkasy Ulttyq banki basqarmasynyń 2026 jylǵy 1 qazandaǵy qaýlysymen engizildi.
Jańartylǵan erejelerge sáıkes, qolma-qol shetel valıýtasyn satyp alý jáne satý kezinde bankter men aıyrbastaý uıymdary klıentterdi jáne olardyń senimdi ókilderin sáıkestendirip, sanktsııalyq tizimderde bar-joǵyn tekserýge mindetti.
Tekserý fotosýreti bar jeke basty kýálandyratyn qujat negizinde júrgiziledi. Qujat qaǵaz túrinde de, memlekettik tsıfrlyq júıeler arqyly elektrondy formatta da usynylýy múmkin.
1 mln somnan (shamamen 5,2 mln teńge) bastalatyn valıýtalyq operatsııalar kezinde klıent jeke tulǵanyń saýalnamasyn toltyrý arqyly qosymsha sáıkestendirýden ótýge tıis. Turaqty iskerlik qatynastar bolmaǵan jaǵdaıda benefıtsıarlyq menshik ıesi de tekseriledi.
Klıent pen júrgizilgen operatsııa týraly aqparat tıisti tirkeý jýrnaldaryna engizilýi kerek.
Sonymen qatar 100 myń somnan (shamamen 517 myń teńge) bastalatyn nemese shetel valıýtasyndaǵy balamaly somaǵa teń aıyrbastaý operatsııalary kezinde uıymdar klıent týraly málimetterdi qosa alǵanda, operatsııaǵa qatysty qajetti aqparatty tirkeýge mindetti. Bul derekter keminde bes jyl saqtalýy kerek.
Kúdikti operatsııa anyqtalǵan jaǵdaıda bankter men aıyrbastaý uıymdary operatsııa kúdikti dep tanylǵan sátten bastap bes saǵat ishinde onyń somasyna qaramastan, qarjylyq barlaý organyna habarlaýǵa mindetti.
Budan bólek, aıyrbastaý uıymdary klıentterge valıýta aıyrbastaý operatsııasynyń júrgizilgenin rastaıtyn qujat berýge tıis. Al aıyrbastaý pýnktteri, mıkroqarjy jáne mıkrokredıttik uıymdar, sondaı-aq kredıttik seriktestikter kassalyq chek berýge mindettelgen.
Eske salaıyq, buǵan deıin Qyrǵyzstanda jeke derekterdi qorǵaý talaptaryn buzǵany úshin aıyppul engiziletinin habarlaǵan edik.
