Qyrǵyzstanda uıymdasqan qylmystyq toptar joq – MUQK

ASTANA. KAZINFORM – Qyrǵyzstannyń mınıstrler kabıneti tóraǵasynyń orynbasary – Memlekettik ulttyq qaýipsizdik komıtetiniń basshysy Kamchybek Tashıev Osh oblysynyń Ózgen aýdany turǵyndarymen kezdesýinde elde uıymdasqan qylmystyq toptardyń kózi joıylǵanyn málimdedi, dep habarlaıdy Kazinfrom menshikti tilshisi.

Arnaıy qyzmet basshysynyń aıtýynsha, uıymdasqan qylmystyq toptarmen eshqashan kelissóz bolmaıdy. Olarmen kúres zań aıasynda júrip jatyr.

Kamchybek Tashıev uıymdasqan qylmystyq toptar buryn Ózgen aýdanynyń barlyq aýyldarynda bolǵanyn aıtty. Uıymdasqan toptarmen kúres sharalarynyń aıasynda qylmystyq toptardyń 7 kóshbasshysy ustalyp, olar artynan qylmystyq ıdeologııadan bas tartty.

- Uıymdasqan qylmystyq toptarmen kúresti men ózim basqaramyn. Bul istiń artynda ulttyq qaýipsizdik, quqyq qorǵaý organdary men prokýratýra, sot tur. Birlesken jumystyń arqasynda eldegi uıymdasqan toptardyń barlyǵynyń kózin joıamyz, - dep qosty ol.

Buǵan deıin joǵary oqý oryndarynyń basshylarymen ótken kezdesýde Qyrǵyz Respýblıkasynyń MUQK tóraǵasy Kamchybek Tashıev Qyrǵyzstannyń uıymdasqan qylmystyq toptardan tazarǵanyn málimdedi. Sondaı-aq ol memleket múddesi úshin qylmys áleminiń serkesi, «zańdaǵy ury» Kamchy Kólbaevty joıý týraly sheshim qabyldaýǵa májbúr bolǵanyn aıtty.

Keıinirek Qyrǵyz Respýblıkasynyń Prezıdenti Sadyr Japarov «Kabar» agenttigine bergen suhbatynda arnaıy qyzmet basshysynyń Kamchy Kólbaevty joıýǵa qatysty málimdemesine túsinikteme berdi.