Qyrǵyzstanda ustalǵan esirtki saýdalaýshylardan gashısh pen marıhýananyń iri partııasy alyndy

BІShKEK. KAZINFORM – Qyrǵyzstanda qylmystyq top satý úshin asa iri kólemde esirtkini zańsyz óndirýmen aınalysqan, dep habarlaıdy Kazinform menshikti tilshisi.

Qyrǵyzstan Respýblıkasy quqyq qorǵaý organdarynyń málimetinshe, 9 aqpanda Jaıyl aýdany, Sosnovka aýylyndaǵy «Tolkýn-1» statsıonarlyq beketinde 39 jastaǵy qyrǵyz áıeliniń basqarýyndaǵy «Toıota Estıma» kóliginen 1,4 keli gashısh pen 18,1 keli marıhýana salynǵan sómkeler tabylǵan. Asa iri kólemdegi esirtki zattary odan ári ótkizý úshin eldiń ońtústik oblystarynan Shý oblysynyń aýmaǵyna tasymaldanǵan.

Qyrǵyzstan Respýblıkasy Qylmystyq kodeksiniń 282-baby «Esirtki, psıhotroptyq jáne olarǵa uqsas zattardy satý úshin zańsyz óndirý» áreketi boıynsha qylmystyq is qozǵaldy.

Tergeý barysynda qylmysqa qatysy bar úsh adam anyqtalyp, ustaldy – 1980 jyly týǵan M.E., 1990 jyly týǵan K.S. jáne 1986 jyly týǵan B.J. Olar ýaqytsha ustaý oqshaýlaǵyshyna qamaldy.

Osyǵan deıin Qyrǵyzstanda tyıym salynǵan ekstremıstik uıym kóshbasshysynyń izdestirilip jatqany habarlandy.