Qyrǵyzstanda UQShU bitimgerlik kúshteri qatysqan oqý-jattyǵý aıaqtaldy
Qyrǵyzstanda UQShU bitimgerlik kúshteri qatysqan «Myzǵymas baýyrlastyq-2023» oqý-jattyǵýy aıaqtaldy, dep habarlaıdy Kazinform QR Qorǵanys mınıstrliginiń baspasóz qyzmetine silteme jasap.
Baspasóz qyzmetiniń málimetterine qaraǵanda, Ujymdyq qaýipsizdik týraly shart uıymynyń birlesken oqý-jattyǵýyna Qazaqstan Qarýly Kúshteriniń Desanttyq-shabýyldaý áskerleri men Áýe qorǵanysy kúshteriniń áskerı qyzmetshileri qatysty.
Birlesken oqý-jattyǵý Qyrǵyzstan Qorǵanys mınıstrliginiń «Edelveıs» oqý-jattyǵý ortalyǵynda ótti. Bul UQShU Ujymdyq bitimgerlik kúshteriniń Ortalyq Azııa óńirinde beıbitshilikti saqtaý jónindegi ujymdyq qaýipsizdik operatsııasyn daıyndaý jáne ony ótkizý kezinde ulttyq kontıngentterdiń úılesimdiligin arttyrýǵa baǵyttalǵan.
Oqý-jattyǵýdyń belsendi kezeńin Qyrǵyzstannyń Qorǵanys mınıstri general-leıtenant Baqtybek Bekbolotov, Tájikstannyń qorǵanys mınıstri Sheralı Mırzo, UQShU Bas hatshysy Imanǵalı Tasmaǵambetov, Qazaqstannyń Desanttyq-shabýyldaý áskerleriniń qolbasshysy general-maıor Almaz Jumakeev, UQShU Hatshylyǵy men Birikken shtabynyń, áskerı-dıplomatııalyq korpýstyń jáne halyqaralyq óńirlik uıymdardyń ókilderi baqylady.
Oqý-jattyǵýda áskerı kontıngentterdi belgilengen aýdanǵa ár túrli tásilmen jetkizýdiń, lekterdi qalyptastyrýdyń, avtomobıl jáne brondy tank tehnıkasy joryǵynyń, kúzetýdi uıymdastyrýdyń, qozǵalys baǵytyna barlaý júrgizýdiń, qoldan jasalǵan jarylǵysh zattardy zalalsyzdandyrýdyń, zańsyz qarýlanǵan quralymdardy buǵattaýdyń jáne olardy joıýdyń taktıkalyq epızodtary pysyqtaldy.
Odan bólek baqylaý-ótkizý pýnktterinde qyzmet atqarý, kólikterdi tekserý, jergilikti jerdi patrýldeý praktıkalyq is-qımyldary da uıymdastyryldy. Mańyzdy ınfraqurylym obektilerin qorǵaý, gýmanıtarlyq kómek legin alyp júrý jáne bosqyndarǵa alǵashqy kómek kórsetý máseleleri pysyqtaldy.
