Qyrǵyzstanda týrısterdi mindetti saqtandyrý erejeleri bekitildi
ASTANA. KAZINFORM — Qyrǵyzstan úkimeti týroperatorlardyń týrıster aldyndaǵy jaýapkershiligin mindetti saqtandyrý tetigin engizdi, dep habarlaıdy Qyrǵyzstandaǵy Kazinform agenttiginiń menshikti tilshisi.
Tıisti qaýlyǵa Qyrǵyz Respýblıkasynyń Mınıstrler kabıneti qol qoıdy.
Qujatqa sáıkes, týroperatorlar ár týrıst úshin azamattyq-quqyqtyq jaýapkershilikti mindetti saqtandyrý rásimdeýge tıis.
Bul tetik kúrdeli izdeý-qutqarý jumystary men taýly aımaqtardaǵy zardap shekken adamdardy evakýatsııalaýǵa baılanysty qarjylyq táýekelderdi memlekettik bıýdjetten saqtandyrý naryǵyna berýge baǵyttalǵan. Sonymen qatar týrısterdiń qaýipsizdigin qamtamasyz etý jáne eldegi týrızm salasyn qaýipsiz etý kózdelip otyr.
Saqtandyrý jaýapkershiliginiń saralanǵan lımıtteri belgilendi:
- 3 mıllıon somǵa deıin (15,6 mıllıon teńge) — dástúrli baǵyttar úshin. Oǵan klassıkalyq ekskýrsııalyq, mádenı-tanymdyq, saýyqtyrý jáne rekreatsııalyq týrlar jatady;
- 5 mıllıon somǵa deıin (26 mıllıon teńge) — týrızmniń ekstremaldy túrleri úshin. Atap aıtqanda, alpınızm, taý shańǵysy, raftıng jáne qoljetimdiligi qıyn aımaqtardaǵy trekıng baǵyttary qamtylady.
Saqtandyrý shartynyń bolýy týroperatorlardyń zańdy túrde jumys isteýiniń mindetti talaby bolady.
Qyrǵyzstan boıynsha kópkúndik dástúrli týrdyń ortasha quny 15-25 myń som (78,2-130,3 myń teńge) bolǵan jaǵdaıda, 5-7 kúnge arnalǵan saqtandyrý polısiniń baǵasy shamamen 3 myń somdy (15,6 myń teńge) quraıdy. Bul kúnine orta eseppen 400-500 somǵa (2 083-2 605 teńge/kún) teń.
Aıta keteıik, 2025 jyldyń tamyz aıynyń ortasynda reseılik alpınıst Natalıa Nagovıtsyna taýda qaıǵyly jaǵdaıǵa tap boldy. Aıaǵyn syndyryp alǵan ol 7 myń metrden astam bıiktiktegi Jeńis shyńynda kómek kútti.
23 tamyzda Qyrǵyzstannyń Tótenshe jaǵdaılar mınıstrligi aýa raıynyń nasharlaýyna baılanysty Reseı azamaty Natalıa Nagovıtsınany izdeý jumystaryn ýaqytsha toqtatty.
Keıin aýa raıynyń kúrt nasharlaýyna baılanysty Qyrǵyzstan TJM-niń 24 tamyzda Ystyqkól oblysyna jiberilgen «Airbus H-125» tikushaǵy alpınıst áıeldi Jeńis shyńynan evakýatsııalaý operatsııasyn toqtatyp, turaqty ornalasqan jerine oralǵany belgili boldy.
27 tamyzda Qyrǵyzstannyń Ulttyq qaýipsizdik memlekettik komıteti dáldigi joǵary jabdyqtarmen jaraqtalǵan ushqyshsyz ushý apparattary arqyly áýeden beınetúsirilim júrgizdi. Onyń nátıjesinde alpınıst áıel bolǵan jerde tirshilik belgileri anyqtalmady.
Keıin quramyna 20 tájirıbeli maman kirgen alpınısterden quralǵan sarapshylar toby Natalıa Nagovıtsınany qutqarý múmkin emes ekenin málimdedi.
2 qyrkúıekte reseılik alpınıst Natalıa Nagovıtsyna Qyrǵyzstanda qaza tapty dep tanyldy.
2026 jyldyń mamyr aıynyń sońynda Qyrǵyzstannyń Tótenshe jaǵdaılar mınıstrligi reseılik alpınıstiń denesin Jeńis shyńynan evakýatsııalaý úshin qajetti kómek kórsetý múmkindigin qarastyrýǵa daıyn ekenin málimdedi.
