Qyrǵyzstanda toı men jerleý rásiminde ysyrapshyldyq úshin aıyppul salynady

BІShKEK. KAZINFORM – Qyrǵyzstan parlamentiniń depýtattary salt-dástúrler, rásimder men merekelerdi ótkizý kezinde artyq shyǵyndy shekteýdi usynyp otyr, dep habarlaıdy Kazinform menshikti tilshisi.

Qoǵamdyq talqylaýǵa usynylǵan zań jobasy otbasylyq is-sharalardy retteýdi engizýdi usynady:

* jerleý kezinde usaq maldy, jylqy nemese iri qara maldy soıýǵa jol berilmeıdi;

* marqumdy jerlegen soń úsh kúnnen keıin bir jylqy nemese iri qara mal soıyp, as berýge («Quran oqý») ruqsat etiledi;

* 3 kún, 7 kún, 40 kúndigi jáne jyldyq asyn ótkizýge tyıym salynady;

* toıǵa sany 250-den aspaıtyn adam shaqyrýǵa jáne bir sıyr nemese jylqy soıýǵa ruqsat etiledi;

* «qyz uzatýǵa» bir sıyr nemese jylqy soıyp, 100 adamnan artyq shaqyrýǵa bolmaıdy;

* úılený toıy men qyz uzatýdy birge ótkizý kezinde bir sıyr nemese jylqy soıyp, 350-den aspaıtyn adam shaqyrýǵa ruqsat etiledi;

* úılený kortejinde úsh kólikten artyq bolmaýy kerek;

* joǵaryda atalǵan salt-joralardy, merekelerdi jáne salt-dástúrlerdi ótkizý kezinde «kıit kıgizý», «sebet berý», «qonaq berý» jáne basqa da osyǵan uqsas ǵuryptar sııaqty qosymsha qajetsiz shyǵyndardy uıymdastyrýǵa tyıym salynady.

Zań talaptaryn buzǵany úshin toı, shara ıesine 300 myń som, mekeme ıesine 100 myń som kóleminde aıyppul salynady.

Qujat bastamashylary sońǵy kezderi elde toı-tomalaqtar men jerleý rásimderine baılanysty halyqtyń tól ádet-ǵurpy men salt-dástúrine sáıkes kelmeıtin keleńsiz qubylystardyń kóbeıip, otbasy qarjysyna aıtarlyqtaı zııan keltiretinin atap ótti.

Zańnyń oryndalýyn baqylaý júrgizýdi jergilikti memlekettik organdar janyndaǵy aýmaqtyq komıssııalarǵa júkteý usynyldy.

Eske salsaq, mıllıarder Omar Kamanı 20 mln fýnt sterlıngke erekshe úılený toıyn ótkizgen edi.