Qyrǵyzstanda tyıym salynǵan ekstremıstik uıym kóshbasshysy izdestirilýde
BІShKEK. KAZINFORM — Qyrǵyzstanda tyıym salynǵan «Hızbýt-Tahrır Ál-Islamı» dinı-ekstremıstik uıymynyń (QR-da atalǵan uıymǵa tyıym salynǵan) joǵary laýazymdy tulǵalary ustaldy.
Kazinform menshikti tilshisiniń habarlaýynsha, olardyń kóshbasshysyna halyqaralyq izdeý jarııalandy.
Qyrǵyzstannyń UQK málimetinshe, buryn qozǵalǵan qylmystyq is aıasynda «Hızbýt-Tahrır Ál-Islamı» dinı-ekstremıstik uıymynyń qazirgi jáne burynǵy masýlalary (el boıynsha kóshbasshylar), qarjygerleri men mýsoıdtary (masýldyń kómekshileri) ustaldy.
— Ustalǵan adamdardyń nusqaýy boıynsha «Hızbýt-Tahrır» dinı-ekstremıstik uıymynyń músheleri birneshe jyl boıy Qyrǵyz Respýblıkasynyń halqy arasynda ekstremıstik ıdeologııany nasıhattaýmen aınalysqan. Budan bólek jańa jaqtaýshylardy tartýmen aınalysyp, ınternette jalǵan akkaýnttar qurǵan. Sondaı-aq Qyrǵyzstan aýmaǵynda ekstremıstik materıaldardy basý jáne taratý úshin jerasty baspahanasyn paıdalanǵan. «HT» DEO ekstremıstik qyzmetti qarjylandyrý úshin respýblıkanyń barlyq aımaǵyndaǵy múshelerinen aqsha jınap kelgen. Alaıda jınalǵan qarajatty joǵary laýazymdy tulǵalar ıemdenip, óz qalaýy boıynsha paıdalandy. Jyl saıyn respýblıka boıynsha uıym músheleri shamamen 7-8 mln som jınady, — delingen habarlamada.
Ulttyq qaýipsizdik komıteti asa iri kólemde alaıaqtyq jasaǵany úshin qyrǵyzstandyq ıÝ.N. D. esimdi azamatqa halyqaralyq izdeý jarııalady. Qyrǵyzstandaǵy «Qyıadat» («HT» DEO shtaby) ókili 1964 jyly týǵan, Osh oblysy Qara Sýý aýylynyń týmasy.
Arnaıy qyzmet usynǵan aqparatqa sáıkes, izdeýdegi adam shetelde júrse de Qyrǵyzstan aýmaǵyndaǵy ekstremıstik qyzmettiń jumysyn úılestirip otyrǵan kórinedi. Bul rette ol shotyna túsetin aqshany ózi alyp keledi.
Buǵan deıin habarlanǵandaı, Qyrǵyzstanda burynǵy tabıǵı resýrstar mınıstri men onyń uly sottaldy.