Qyrǵyzstanda TikTok-ty qaıta ashý máselesi qaıta kóterildi
ASTANA. KAZINFORM – Qyrǵyzstan parlamentinde TikTok áleýmettik jelisine qoıylǵan shekteýdi alyp tastaý týraly usynys taǵy da talqylandy, dep habarlaıdy Kazinform-nyń Bishkektegi menshikti tilshisi.
Jogorký Kenesh otyrysynda depýtat Mahabat Mavlıanova atalǵan platformany buǵattaýdy qaıta qaraý bastamasyn kóterdi.
Onyń aıtýynsha, elde TikTok-qa shekteý engizilgenimen, paıdalanýshylar qosymshaǵa VPN arqyly kirip otyr.
– Árıne, ulttyq qaýipsizdik pen jastar tárbıesi sııaqty mańyzdy máselelerdi eskerýimiz kerek. Alaıda tyıym salý arqyly bul problemalardy sheshe almaımyz. Qazirgi tańda TikTok tek oıyn-saýyq platformasy emes, aqparat taratý, bilim damytý jáne bıznesti ilgeriletý alańyna aınaldy. Myńdaǵan jas osy platforma arqyly óz talantyn kórsetip, shaǵyn bıznesti damytyp otyr. Kóptegen jastar úshin bul tabys kózine aınaldy. Osyǵan baılanysty tyıymdy alyp tastaý qajet, – dedi depýtat.
Aıta keteıik, 2025 jylǵy qańtarda Jogorký Kenesh depýtattary úkimetke TikTok-ty qaıta ashý jáne elde onyń ókildigin qurý jóninde usynys jasaǵan bolatyn.
Eske sala ketsek, 2024 jylǵy sáýirde Qyrǵyzstanda TikTok áleýmettik jelisine qoljetimdilik shektelgen edi.
