Qyrǵyzstanda temekini syrttan ákelýge ýaqytsha tyıym salynady
BІShKEK. KAZINFORM – Qyrǵyz Respýblıkasynyń Ekonomıka jáne saýda mınıstrligi Eýrazııalyq ekonomıkalyq odaqqa múshe emes elderden Qyrǵyzstan aýmaǵyna temeki ákelýge, tranzıtke jáne keri eksporttaýǵa alty aı merzimge tyıym salýdy usynyp otyr. Úkimettiń tıisti qaýlysy talqylaýǵa shyǵaryldy.
Qujat Qyrǵyz Respýblıkasy azamattarynyń densaýlyǵyn kontrafaktilik, sertıfıkaty joq temekini tutynýdan qorǵaý, sondaı-aq kontrabandaǵa qarsy kúresti kúsheıtý jáne memlekettik bıýdjetke túsetin salyq túsimderiniń boljamdy kórsetkishterin oryndaý maqsatynda ázirlengen.
2023 jyly Salyq qyzmeti zańsyz aınalymnan 65 231 qorap temeki tárkilegen. 2023 jyly Qyrǵyz Respýblıkasynda zańsyz temekiniń úlesi 17,7 paıyzdy qurady. Oris, Mondeo, Like jáne Madrid markalarymen shyǵarylǵan kontrafaktilik temeki ónimderi BAÁ men Serbııada shyǵaryldy. Joǵaryda atalǵan markalar tehnıkalyq reglament sáıkestigine sertıfıkattaýdan ótken joq.
Sarapshylardyń zertteýlerine sáıkes, Qyrǵyzstan Ortalyq Azııadaǵy temeki ónimderin zańsyz aınalymǵa engizýdiń negizgi ortalyǵy bolyp qala beredi. Sońǵy 4 jylda bajsyz saýda dúkenderinde satýǵa arnalǵan temeki ónimderin jetkizý kólemi 10 eseden astam ósti. Sonymen qatar, 2023 jyly bajsyz saýda aımaqtary men kedendik qoımalardaǵy temeki aınalymynyń kólemi 300 mln qorap temekige jetti.
Buǵan deıin Qyrǵyzstanda iri qara, usaq mal jáne jylqy malyn úshinshi elge eksporttaýǵa tirkeý jáne ruqsat berý ýaqytsha toqtatylǵany týraly jazǵan bolatynbyz.
