Qyrǵyzstanda Tájikstan jáne Ózbekstan shekarasynda baqylaýdy kúsheıtý usynyldy

BІShKEK. KAZINFORM – Elde qyrǵyz-tájik jáne qyrǵyz-ózbek shekarasyndaǵy keıbir ótkizý pýnktterinde kóliktik baqylaýdy engizý kózdelip otyr, dep habarlaıdy Kazinform agenttiginiń menshikti tilshisi.

Mınıstrler kabınetiniń tıisti qaýlysynyń jobasy qoǵamdyq talqylaýǵa shyǵaryldy. Qazirgi ýaqytta EAEO-nyń syrtqy shekarasynyń qyrǵyz ýchaskesinde kóliktik baqylaý «Torýgart-avtodorojnyı», «Irkeshtam-avtodorojnyı» (QHR), «Qaramyq-avtodorojnyı», «Qyzyl-Bel-avtodorojnyı», «Qulyndy-avtodorojnyı» (Tájikstan), «Dostyq-avdorojnyı» (Ózbekstan) avtomobıl ótkizý pýnktterinde júzege asyrylyp keledi.

Sonymen birge, «Kaıragach-avtodorojnyı», «Bor-Dobo-avtodorojnyı» (Tájikstan), «Qyzyl-Qııa-avtodorojnyı», «Qara-Bagysh-avtodorojnyı» jáne «Keń-Saı-avtodorojnyı» (Ózbekstan) ótkizý pýnktterinde qyrǵyz-tájik shekarasy boıynsha qyrǵyz-ózbek memlekettik shekarasy boıynsha kóliktik baqylaýdy júzege asyrý qarastyrylmaǵan.

Atalǵan baqylaý-ótkizý pýnktteri arqyly kórshiles jáne basqa elderdiń kólikteri ekijaqty halyqaralyq tasymaldaýda ǵana emes, júkti sonymen qatar Tájikstan, Qazaqstan, Reseı jáne basqa da memleketterge tasymaldap júr, bul rette halyqaralyq avtomobıl qozǵalysy týraly halyqaralyq kelisimderdiń normalary buzylyp otyr.

Qyrǵyzstan aýmaǵyna kirý jáne tranzıttik ótý úshin sheteldik kólik tasymaldaýshylardyń tıisti ruqsat túrleri bolýy tıis. Sheteldik kólik tasymaldaýshy avtomobıl kóligi týraly halyqaralyq sharttardyń erejelerin buzǵany, onyń ishinde eldiń aýmaǵyna halyqaralyq tasymaldaý úshin tıisti ruqsatsyz kirgeni úshin Qyrǵyz Respýblıkasynyń aýmaǵyna kirýge tyıym salý qarastyrylǵan.

Osyǵan baılanysty Tájikstan jáne Ózbekstanmen memlekettik shekarada keden organdary kedendik jáne kóliktik baqylaýdy júzege asyratyn ótkizý pýnktteriniń tizbesine ózgertýler engizý usynylyp otyr.

Qyrǵyzstan Reseıge óz mıgranttarynyń máseleleri boıynsha nota bergenin jazǵan bolatynbyz.