Qyrǵyzstanda taýyq jumyrtqasyn ımporttaýǵa tyıym salyndy

ASTANA. KAZINFORM — Eldegi azyq-túlik taýarlarynyń naryqtyq baǵasyn turaqtandyrý maqsatynda 1 mamyrdan bastap Qyrǵyzstanda jumyrtqa ımporttaýǵa tyıym salynady, dep jazady KABAR.

Qyrǵyz Respýblıkasy Sý resýrstary, aýyl sharýashylyǵy jáne melıoratsııa mınıstrliginiń málimetinshe, shekteý 6 aı merzimge engiziledi. Bul shekteý Qyrǵyzstan arqyly tranzıtke jáne EAEO-nyń bir sýbektinen ekinshisine Qyrǵyzstan aýmaǵy arqyly tasymaldaýǵa qatysty emes ekenin aıta ketken jón.

10 aqpannan búgingi kúnge deıin respýblıka aýmaǵynda kórshi elderden ımporttalǵan jumyrtqa tirkelmegen. Kerisinshe, 2025 jyldyń qańtar-naýryz aılaryndaǵy derekterge sáıkes, Qyrǵyzstannan Qazaqstanǵa 8 812 800 jumyrtqa eksporttalǵan.

Sonymen qatar, qazirgi ýaqytta elde taýyq jumyrtqasyna qatysty másele kóbinese ishki naryqtaǵy iri jáne usaq qus fabrıkalary arasyndaǵy básekelestiktiń artýyna jáne ishki óndiristiń kóbeıýine baılanysty týyndap otyr. 

Osyǵan baılanysty mınıstrlik fermerlerge taýyq etin óndirýdi usynady. Sebebi jylyna elge 91 000 tonnadan astam taýyq eti jetkiziledi. Bul óz kezeginde taýyq etin jumyrtqaǵa qaraǵanda tabysy moldaý baǵyt ekenin kórsetedi. Sonymen qatar, qazirgi ýaqytta aýyldyq jerlerde ár otbasy 30-40 taýyqtan asyraıdy, bul da ishki óndiristiń artýyna jáne suranystyń tómendeýine ákep soǵady.

Sondaı-aq, mınıstrlik el ishinde bir aımaqtan ekinshi aımaqqa taýarlardyń erkin ótýine tyıym sala almaıtynyn atap ótti.

Buǵan deıin habarlanǵandaı, Qyrǵyzstan elge polıetılen paketterin kirgizýge ýaqytsha tyıym salmaqshy.