Qyrǵyzstanda tasqyn kezinde bir otbasynyń tórt adamy iz-túzsiz ketti
OSh. KAZINFORM — Qryǵyzstannyń Osh qalasynda sel kezinde tórt adam ushty-kúıli joǵalyp ketti. Bul jaıynda 24.kg resýrsynan habarlandy.
Osh qalasynyń «Molbulaq» demalys ortalyǵynda demalyp jatqan tórt adamdy tasqyn sý alyp ketken. Bul týraly áleýmettik jelilerde qala merııasynyń basshysy Jumamıdın Sýlaımanqulov málimdedi.
«Aǵyn sý sondaı-aq jeti kólikti aǵyzyp áketti, onyń tórteýi tabyldy» deıdi ol.
Qalada tótenshe jaǵdaı rejımi jarııalandy.
TJM aldyn ala aqparaty boıynsha, sý tasqynynda joǵalyp ketken adamdar — bir otbasynyń músheleri, ıaǵnı 44 jastaǵy anasy men 19, 8 jáne 6 jasar úsh qyzy.
Qazirgi ýaqytta izdestirý-qutqarý jumystary jalǵasyp jatyr. Oqıǵa ornynda 46 qutqarýshy jumys isteýde, 420 adam evakýatsııalanǵan.
Osh oblysy aýmaǵyndaǵy kúshti selden keıin Qarasý aýdandyq elektr jelilerinen elektr qýatyn alatyn 7,5 myń tutynýshy jaryqsyz qaldy.
Sý tasqyny 8 elektr tiregin shaıyp ketti.
Qazirgi ýaqytta qalpyna keltirý jumysyna 26 adam jáne 6 arnaıy tehnıka jumyldyrylǵan.
TJM málimetine sensek, 134 úıdi sý basyp, 17 úıdiń qorshaýyn qıratty.
Selden zardap shekken 30 adam dáriger kómegine júgingen. Onyń ishinde 17-sine jergilikti jerde kómek kórsetildi, toǵyz adam qalalyq klınıkaǵa, tórt adam oblystyq aýrýhanaǵa jatqyzylǵan.
