Qyrǵyzstanda tarıhı-mádenı murany qorǵaý erejeleri ózgerdi
ASTANA. KAZINFORM — Qyrǵyzstanda tarıhı-mádenı murany qorǵaý erejelerin ózgertetin zań qabyldandy, dep habarlaıdy Kabar.
«Tarıhı-mádenı murany qorǵaý jáne paıdalaný týraly» Zańǵa engizilgen ózgerister Jogorký Keneshte úsh oqylymda maquldanǵan.
Buǵan deıin arheologııalyq zertteý júrgizý tártibi bıýrokratııalyq kedergilermen kúrdelengen bolatyn. Eskertkishter tabylýy yqtımal aýmaqtardyń naqty tizimi bolmaǵan, arheologterdiń jumysyn tirkeý men baqylaýdyń biryńǵaı tártibi de bekitilmegen edi. Memlekettik organdardyń ózara árekettestigi álsiz úılestirilgen. Munyń bári qurylys jáne jer paıdalaný jobalaryn júzege asyrýda kidiristerge alyp keletin.
Jańa zań ózgeristeri qurylys, jol salý, jerdi ıgerý, tyń jerlerdi ıgerý jáne karerlerdi qazý kezindegi arheologııalyq zertteý jumystaryn jeńildetý men jedeldetýge baǵyttalǵan. Bul ásirese ınjenerlik-izdestirý jumystary men jer telimderin transformatsııalaý kezeńinde mańyzdy.
Endi quzyretti organ eskertkish kezdesýi múmkin aýmaqtar tizimin jasap, bekitedi. Mundaı aýmaqtarda arheologııalyq zertteý mindetti túrde júrgizilýi tıis.
Qurylys, jol salý, jer transformatsııasy jáne basqa da jumystarmen aınalysatyn uıymdar arheologııalyq zertteýdi óz qarajaty esebinen júrgizip, ony quzyrly organmen kelisýge mindetti.
Eger jumystar kezinde mádenı mura nysandary tabylsa, olardyń saqtalýyn qamtamasyz etý maqsatynda jumystar ýaqytsha toqtatylady nemese tolyqtaı tyıym salynýy múmkin.
Al bul tizimge enbegen aýmaqtarda arheologııalyq zertteý júrgizý mindetti emes, bul óz kezeginde jerdi ıgerý protsesin edáýir jeńildetip, jedeldetedi.
Sondaı-aq arheologııalyq qazba jumystary júrgizý tártibi de ózgerdi. Endi arheologııalyq jumystar tek arnaıy ruqsat — Tarıh ıstıtýtynyń ornyna quzyretti organ beretin «Ashyq paraq» negizinde ǵana ruqsat etiledi. Arheologterge tirkeý, esep berý jáne jaýapkershilikke baılanysty naqty tártip engizildi.
Budan buryn habarlanǵandaı, Qyrǵyzstanda tek kásibı psıhologter óz qyzmetin jarnamalaı alýy múmkin.