Qyrǵyzstanda qatty soqqan jelden 10 adam zardap shegip, 154 nysan búlindi

BІShKEK. KAZINFORM – Bir kún buryn Qyrǵyzstannyń Bishkek, Shý jáne Talas oblystarynda qatty jel saldarynan 10 adam jaraqat aldy, 154 nysan búlindi.

Qyrǵyz Respýblıkasy Tótenshe jaǵdaılar mınıstrligi baspasóz qyzmetiniń habarlaýynsha, tańǵy saǵat 8:30-daǵy jaǵdaı boıynsha úsh oblysta 10 adam jaraqat alyp, 70 áleýmettik nysan, 80 turǵyn úı jáne 4 sharýashylyq ǵımarat zaqymdanǵan.

Bishkekte 66 nysan búlingen, onyń ishinde 26 áleýmettik mekeme, 36 turǵyn úı, 4 sharýashylyq ǵımarat bar. Shý oblysynda 42 áleýmettik nysan men 42 turǵyn úıdiń shatyry julyndy.

Qazirgi tańda jergilikti azamattyq qorǵaý qyzmetteri tabıǵı apattyń saldaryn joıý, materıaldyq shyǵyndy anyqtaý jáne jedel sharalar qabyldaý jumystaryn júrgizip jatyr.

Buǵan deıin Bishkekte sekýndyna 26 metr jyldamdyqpen soqqan qatty jel saldarynan qala ákimdigi tótenshe jaǵdaı jarııalaǵany habarlanǵan bolatyn. Bishkekte qatty jelden 11 mektep pen 8 balabaqsha búlindi.