Qyrǵyzstanda sýbsıdııa kvotalaryn zańsyz taratqan sheneýnikter áshkerelendi
ASTANA. KAZINFORM — Qyrǵyzstannyń sý resýrstary, aýyl sharýashylyǵy jáne óńdeý ónerkásibi mınıstriniń orynbasaryn respýblıkanyń arnaıy qyzmeti sybaılas jemqorlyqqa qatysy bar degen kúdikpen ustady. Bul týraly Kabar.kg habarlady.
Belgili bolǵandaı, 2025 jyldyń shilde aıynda mınıstrlik azyq-túlik qaýipsizdigin qamtamasyz etý jáne ishki naryqty turaqtandyrý maqsatynda mal eksporttaýǵa kvota engizgen.
Alaıda Aýyl sharýashylyǵy mınıstriniń orynbasary, Veterınarııalyq qyzmettiń dırektory, mınıstrlik bólim basshysy jáne veterınarııalyq qyzmet bóliminiń bastyǵy qyzmettik ókilettikterin teris paıdalanyp, mal sharýashylyǵymen shyn máninde aınalyspaıtyn, ózderine affılırlengen tulǵalarǵa zańsyz kvota berý boıynsha jemqorlyq josparyn uıymdastyrǵan. Bul rette olardyń mal basy bar degen aktilerdi mınıstrlik basshylarynyń nusqaýymen aýdandyq veterınarııa basqarmasynyń qyzmetkerleri qoldan jasaǵan.
Aradaǵy deldal-kásipkerler zańsyz alynǵan kvotalardy fermerlerge jáne mal eksporttaýmen aınalysatyn adamdarǵa satyp, iri qara maldyń ár basyn 300 AQSh dollarynan, al usaq maldyń ár basyn 5 myń somnan bergen.
Osy jemqorlyq syzbanyń saldarynyn Jalal-Abad oblysy aýmaǵy arqyly kórshi Ózbekstan Respýblıkasyna 40 myńnan astam mal zańsyz eksporttalǵan, bul et baǵasynyń qymbattaýyna sebep boldy.
Qazirgi ýaqytta qozǵalǵan qylmystyq is aıasynda Aýyl sharýashylyǵy mınıstrliginiń atalǵan laýazymdy tulǵalary men deldal-kásipkerler ustalyp, Jalal-Abad oblysy boıynsha UQK-niń tergeý ızolıatoryna qamaýǵa alyndy. Tergeý amaldary júrgizilip jatyr.
Aıta ketelik Qyrǵyzstan iri ınvestorlar úshin jaǵdaıdy jeńildetip jatqany týraly jazǵan edik.