Qyrǵyzstanda stýdentterge arnalǵan nesıe berile bastaıdy
ASTANA. KAZINFORM — Bul týraly Qyrǵyzstan prezıdenti Sadyr Japarov eldiń áleýmettik-ekonomıkalyq damýynyń strategııalyq baǵyttaryna arnalǵan respýblıkalyq keńeste málimdedi. Bul týraly Kazinform agenttiginiń Bishkektegi menshikti tilshisi habarlaıdy.
Qyrǵyzstan prezıdenti bilim men ǵylymnyń qazirgi jaǵdaıy jáne bolashaǵy týraly óz kózqarasyn aıtty. Onyń sózinshe, joǵary oqý oryndarynda irgeli jáne qoldanbaly ǵylymdar, kıbernetıka, ınjenerııa jáne tehnıkalyq pánder salasyndaǵy mamandardy daıarlaýǵa basymdyq beriledi. Sondaı-aq mektepterde jaratylystaný ǵylymdary, tehnologııa, ınjenerııa jáne matematıka baǵytyndaǵy bilim berýdi damytýǵa erekshe kóńil bólinedi.
— Bizdiń stýdentter halyqaralyq deńgeıdegi joǵary bilim alý múmkindigine ıe bolýy kerek. Biz álemniń jetekshi ýnıversıtetterimen qos dıplomdy birlesken baǵdarlamalardy damytyp, Qyrǵyzstanda tanymal halyqaralyq ýnıversıtetterdiń fılıaldaryn ashýǵa jaǵdaı jasaımyz, — dedi Sadyr Japarov.
Qyrǵyzstan basshysy kásiptik bilim berýge de erekshe nazar aýdardy. Bilim berý baǵdarlamalary salalyq qaýymdastyqtarmen jáne jumys berýshilermen birlesip ázirlenip, jańartylatyny atap ótildi. Bul rette praktıkalyq daıarlyqqa, zamanaýı tehnologııalarǵa jáne naqty kásibı daǵdylardy qalyptastyrýǵa basymdyq beriledi.
— Ol úshin bizge Qyrǵyzstannan da, shetelden de joǵary bilikti akademııalyq mamandar qajet. Biz osyndaı mamandardy elge tartýǵa, olardy jumys oryndarymen qamtamasyz etýge, memlekettik tapsyrystar berýge, ǵylymı zertteýlerdi qarjylandyrýǵa jáne qajetti turǵyn úı jaǵdaılaryn jasaýǵa daıynbyz, — dedi ol.
Qyrǵyzstan prezıdentiniń aıtýynsha, bilim alýdyń qoljetimdiligin arttyrý maqsatynda jaqyn arada elde «Stýdenttik nesıe» dep atalatyn uzaq merzimdi tetik iske qosylady.
Buǵan deıin Sadyr Japarov 2030 jyldyń sońyna qaraı eldiń jalpy ishki óniminiń jyldyq ortasha ósimin 8 paıyzǵa jetkizýdi tapsyrǵany habarlanǵan bolatyn.
