Qyrǵyzstanda stýdentterdi rotatsııalaý júıesi engiziledi
ASTANA. KAZINFORM — 2027 jyly Qyrǵyzstanda stýdentterdi rotatsııalaý júıesi engizilmek. Bul týraly Jogorký Kenesh otyrysynda el prezıdenti Sadyr Japarov aıtty, dep habarlaıdy Kazinform agenttiginiń Bishkektegi tilshisi.
Prezıdenttiń sózinshe, memleket joǵary oqý oryndarynda oqytý úshin 10 myń bilim berý grantyn bóledi. Onyń ishinde, soltústik aımaqtan 5 myń stýdent ońtústikke oqýǵa ketse, ońtústik aımaqtan 5 myń stýdent soltústikke oqýǵa barady.
Eldiń barlyq oblystarynda jáne Qyrǵyzstan astanasynda zamanaýı stýdenttik jataqhanalar salynyp, barlyq jaılylyq qamtamasyz etiledi. Jańa bastama el azamattaryn óńirler boıynsha bólinýden qorǵaýǵa baǵyttalǵan.
Sadyr Japarov sońǵy bes jylda eldi soltústik jáne ońtústikke bólý týraly áńgimelerdiń derlik toqtaǵanyn atap ótti. Kez kelgen bólinýdi toqtatý maqsatynda ákimder, sýdıalar jáne basqa memlekettik qyzmetshilerdiń rotatsııasy júrgizilgen, onyń nátıjesi oń boldy.
Buǵan deıin habarlanǵandaı, Qyrǵyzstanda 12 jyldyq mektepti támamdaý týraly alǵashqy attestattar 2029 jyly berilmek.