Qyrǵyzstanda sóz bostandyǵyn shekteý múmkin emes - Sadyr Japarov
ASTANA. Kazinform - Qyrǵyzstanda sóz bostandyǵyn shekteý múmkin emes, halyq buǵan jol bermeıdi. Bul týraly Kabar agenttigine bergen suhbatynda Qyrǵyzstan prezıdenti Sadyr Japarov aıtty.
Qyrǵyzstandaǵy sóz bostandyǵy jaǵdaıynyń nasharlaýyna qatysty halyqaralyq jáne qoǵamdyq uıymdardyń reıtıngisine toqtalǵan memleket basshysy qyrǵyz halqy ejelden sóz bostandyǵyn jaqtaýshy bolǵanyn atap ótti.
– Jaǵdaı ýshyǵyp ketti degenderdiń ózderi jaǵdaıdy turaqsyzdandyrýǵa múddeli. Olar «sóz bostandyǵy» degen termınniń artyna jasyrynyp, qalaǵanyn isteıdi. Bular — jalǵan patrıottar. Halyq arasynda synı oılaýdy damytýǵa baǵyttalǵan úgit-nasıhat jumystary belsendi júrgizilip jatyr. Bul memlekettigimizge, dilimizge, salt-dástúrimizge qaıshy keledi. Jalǵan aqparat taratyp, bireýge jala jabý áreketteri kóbeıdi. Biz jaǵdaıdy turaqsyzdandyrýǵa baǵyttalǵan ózimshil maqsattardyń shyndyqqa aınalýyna jol bermeımiz. Muny kimniń istep jatqanyn halyq jaqsy biledi jáne túsinedi. Eger bılik sóz bostandyǵyna ádiletsiz qol suǵatyn bolsa, halyq áldeqashan kóteriler edi», - dedi prezıdent.
Sadyr Japarov Qyrǵyzstanda adam quqyǵy tolyǵymen saqtalatynyna sendirdi.
– Bul rette olqylyqtar da joq emes. Keı jaǵdaıda adam faktoryna baılanysty bolyp jatady, biraq biz mundaı jaǵdaılarǵa dereý den qoıýǵa jáne azamattardyń zańdy quqyqtaryn qorǵaýǵa tyrysamyz. Ókinishke qaraı, keıbir azamattar «demokratııa» uǵymyn múldem basqa baǵytta qoldanýǵa tyrysady. Demokratııanyń atyn jamylyp, jalǵan aqparat taratyp, tártipsizdikke shaqyrady. Keıbir aqparattyq saıttar aqparattyń durystyǵyna kóz jetkizbesten, ótirikti shyndaı qylyp kórsetedi. Jalpy, elimizde mundaı jaǵdaılar kóp. Sondyqtan biz durys demokratııalyq ustanymdar boıynsha ómir súrýdi úırenýimiz kerek», – dedi.
Onyń pikirinshe, demokratııa men sóz bostandyǵynyń álemdik reıtıngisin sóz bostandyǵynyń artyna jasyrynǵandar jasaıdy.
– Eger biz olardyń sharttaryna kelisip, tabıǵatymyzǵa jat zııandy saıasatyn sińirsek, sóz bostandyǵy men adam quqyǵyn qorǵaý reıtıngisinde aldyńǵy oryndardan kóriner edik. Bizge memleketti ýaqyt óte kele moraldyq turǵydan buzatyn basshylyq qajet emes», - dedi Sadyr Japarov.
Buǵan deıin Sadyr Japarov Kabar agenttigine bergen suhbatynda elde bılikti kúshpen aýystyrýǵa negiz joq ekenin aıtqan bolatyn.
