Qyrǵyzstanda sottalǵandarǵa qaıtadan keshirim jasaý usynyldy
ASTANA. KAZINFORM — Qyrǵyzstanda qylmys jasaǵany úshin sottalyp, sot úkimimen taǵaıyndalǵan jazasyn ótep jatqan azamattarǵa qaıtadan keshirim jasaýǵa resmı túrde ruqsat berý usynyldy, dep habarlaıdy Kazinform agenttiginiń Bishkektegi menshikti tilshisi.
Prezıdenttiń tıisti jarlyǵynyń jobasy qoǵamdyq talqylaýǵa usynyldy.
Buǵan deıin zańnamada mundaı jaǵdaılarǵa qatysty naqty tártip belgilenbegen. Usynylyp otyrǵan ózgerister keshirim jasaý rásimin jeńildetip, jedeldetýge, sondaı-aq qaıtalama ótinish berýdiń naqty merzimderin belgileýge baǵyttalǵan.
Jańa erejege sáıkes, buryn keshirimge ilikken azamattarǵa keshirim jasaý týraly qaıta ótinish berýge múmkindik qarastyrylady.
Belgili bir merzimge bas bostandyǵynan aıyrylǵandar erekshe mán-jaılar bolmaǵan jaǵdaıda, taǵaıyndalǵan jaza merziminiń keminde jartysyn ótegennen keıin ǵana keshirim jasaý týraly qaıta ótinish bere alady. Eger alǵashqy ótinishti qanaǵattandyrýdan bas tartý týraly jarlyqqa qol qoıylǵan kezde sottalǵan adam jaza merziminiń jartysyn ótep qoıǵan bolsa, keshirim surap qaıta ótinish berý úshin atalǵan jarlyqqa qol qoıylǵan kúnnen bastap bir jyl kútýi qajet.
Ómir boıyna bas bostandyǵynan
aıyrylǵandar jańa ári dáleldi negizder bolmaǵan jaǵdaıda, keshirim jasaý týraly qaıta ótinishti aldyńǵy ótinishi qabyldanbaǵannan keıin 10 jyl ótken soń ǵana joldaı alady.
Qujatta keshirim jasaý týraly ótinishti merziminen buryn qaraýǵa negiz bolatyn aıryqsha jaǵdaılar da aıqyndalǵan. Olar:
* sottalǵan adamnyń ómirine qaýip tóndiretin aýyr naýqasqa shaldyǵýy;
* Sottalǵan adamnyń aýrýyna baılanysty túrmede jazasyn óteý ómirine qaýip tóndirýi nemese múmkin bolmaýy;
* Sottalǵan adamnyń óz áreketin túsiný ne basqarý qabiletinen aıyratyn jáne arnaıy emdeýdi qajet etetin psıhıkalyq aýrýǵa shaldyǵýy;
* keshirim jasaý týraly aldyńǵy ótinish qaralǵannan keıin I toptaǵy múgedektiktiń belgilenýi;
* Sottalǵan adamǵa jazasyn ótep jatqan mekemede kórsetý múmkin emes shuǵyl emniń qajet bolýy.
Buǵan deıin Qyrǵyzstanda marqumdy óz betinshe jerlegeni úshin jazany qatańdatý máselesi qarastyrylyp jatqany habarlanǵan bolatyn.
