Qyrǵyzstanda sońǵy saılaý okrýginde depýtattardy saılaý boıynsha úgit-nasıhat jumystary bastaldy

BІShKEK. KAZINFORM – Qyrǵyzstanda sońǵy kóp mandatty №13 saılaý okrýginde Jogorký Kenesh (Parlament) depýtattaryn qaıta saılaý boıynsha úgit-nasıhat naýqanynyń kezeńi bastaldy, dep habarlaıdy Kazinform menshikti tilshisi. 

Qyrǵyzstan Respýblıkasy Ortalyq saılaý komıssııasynyń málimetinshe, kezekten tys saılaýǵa qatysýǵa 25 kandıdat tirkelgen, onyń ishinde 15 er jáne 10 áıel bar. Jogorký Keneshke barlyǵy úsh depýtat saılanady. Saılaý naýqany 20 kúnge sozylady. Ol 2026 jyldyń 9 aqpanynda bastalyp, 2026 jyldyń 28 aqpanynda saǵat 8:00-ge qaraı aıaqtalady. 

№13 kóp mandatty saılaý okrýgi boıynsha parlamenttik saılaý tizimindegi saılaýshylar sany 161 347 adamdy quraıdy. Úgit-nasıhat jınalystarda, mıtıngilerde, BAQ jáne ınternet-basylymdar arqyly júrgizilýi múmkin.

Eske sala ketsek, 30 qarashada Qyrǵyzstanda Jogorký Kenesh depýtattarynyń kezekten tys saılaýy ótti. Saılaýdaǵy daýys berý protsesi tolyǵymen avtomattandyrylǵany belgili boldy. 

Prezıdent Qasym-Jomart Toqaev Sadyr Japarovty Qyrǵyz Respýblıkasy Jogorký Keneshi saılaýynyń tabysty ótýimen quttyqtady. 

Qyrǵyzstandaǵy parlament saılaýyna qansha adam qatysqanyn myna materıaldan oqı alasyz.

2025 jyldyń 3 jeltoqsanynda Qyrǵyzstan Respýblıkasynyń Saılaý jáne referendýmdar jónindegi ortalyq komıssııasy birqatar buzýshylyqtarǵa baılanysty № 13 kóp mandatty saılaý okrýgindegi Jogorký Kenesh depýtattarynyń merziminen buryn saılaýyn jaramsyz dep tanydy.