Qyrǵyzstanda sógis alǵan sheneýnikterge shetelge issaparlarǵa shyǵýǵa tyıym salyndy
ASTANA. KAZINFORM – Qyrǵyzstanda saıası qyzmet atqaratyn memlekettik qyzmetkerlerdiń jaýapkershiligi kúsheıtildi. Bul týraly Prezıdent ákimshiliginiń aqparattyq saıasat qyzmetiniń jetekshisi Daıyrbek Orýnbekov óziniń Facebook paraqshasynda habarlady, dep jazady Kazinform agenttiginiń menshikti tilshisi.
Prezıdent jarlyǵyna engizilgen ózgeristerge sáıkes, tártiptik jaza alǵan (eskertý nemese qatań eskertý) memlekettik qyzmetker sheteldik issaparlarǵa shyǵý quqyǵynan aıyrylady. Sonymen qatar syıaqylar men kótermeleý tólemderi ýaqytsha toqtatylady.
— Bul shara saıası qyzmetkerlerdiń jaýapkershiligin arttyrýǵa baǵyttalǵan. Endi árbir basshy nemese joǵary laýazymdy sheneýnik óz mindetin naqty oryndaýǵa, uqypty bolýǵa, zań men tártipti saqtaýǵa mindetti, — dep málimdedi Daıyrbek Orýnbekov.
Buǵan deıin Qyrǵyzstanda memlekettik qyzmetkerlerdiń issapar sanyn qysqartý josparlanyp jatqany habarlanǵan edi.
Aıta ketelik Qyrǵyzstanda asyl tuqymdy mal sharýashylyǵy tsıfrlyq júıege kóshirildi.