Qyrǵyzstanda shekaradaǵy zańsyzdyqtarǵa qatysy bar 20-dan astam sheneýnik ustaldy
ASTANA. KAZINFORM – Búgin Qyrǵyzstanda UQK tóraǵasy Kamchybek Tashıevtiń qatysýymen ótken keńes barysynda 20-dan astam sheneýnik ustaldy.
Keńeste Kamchybek Tashıev bıylǵy 20 qańtardan bastap kúshine engen «Sybaılas jemqorlyqqa qarsy is-qımyl týraly» zańǵa qaramastan, birqatar memlekettik organdarda qyzmetkerlerdiń fýnktsıonaldyq mindetterin oryndaýyna baqylaýdyń álsizdigi, sybaılas jemqorlyq táýekelderin joıýǵa baǵyttalǵan túsindirý-profılaktıkalyq jáne taldamalyq jumystyń jetkiliksizdigi, sondaı-aq «osal» ýchaskelerge kadr irikteý sapasynyń tómendigi baıqalatynyn atap ótti.
Tóraǵanyń málimetinshe, búgingi keńestiń negizgi taqyryby «Chaldovar–Avtojol» baqylaý-ótkizý pýnktindegi (BÓP) jaǵdaı boldy. Jedel-izdestirý is-sharalarynyń nátıjesinde atalǵan BÓP aımaǵynda baqylaýshy organdardyń laýazymdy tulǵalarynyń aldyn ala sóz baılasýy arqyly uıymdastyrylǵan jańa, turaqty jemqorlyq shemasy áshkerelendi.
Jemqorlyq tizbegine Memlekettik salyq qyzmeti mamandary, Shekara qyzmetiniń áskerı qyzmetshileri, Veterınarııalyq jáne fıtosanıtarııalyq qaýipsizdik jónindegi memlekettik ınspektsııa qyzmetkerleri, sondaı-aq Kólik jáne kommýnıkatsııalar mınıstrligi janyndaǵy Ólshem-salmaqtyq baqylaý memlekettik ınspektsııasynyń qyzmetkerleri tartylǵany anyqtaldy.
- Tergeý derekterine saı, BÓP aımaǵynda salyq, shekara, kólik jáne aýyl sharýashylyǵy vedomstvolarynyń jekelegen ókilderi jergilikti deldaldarmen ymyralasa otyryp, EAEO elderinen taýarlardy zańsyz ákelý (kontrabanda) shemasyn qurǵan. Ol úshin jalǵan taýar-ilespe qujattar paıdalanylyp, ákelinetin taýarlardyń naqty kólemi men quny jekeleı baıý maqsatynda ádeıi burmalanǵan, - delingen aqparatta.
UQMK málimetinshe, atalǵan turaqty jemqorlyq shemasyna qatysy bar birneshe laýazymdy tulǵa ustaldy. Materıaldar is júrgizý tártibimen rásimdelýde.
Aıta keteıik, Qyrǵyzstanda memlekettik organdardyń qyzmetin baǵalaý júıesi engizildi.