Qyrǵyzstanda sheteldik nómirli kólikterdi zańdastyrýǵa sońǵy múmkindik berildi
BІShKEK. KAZINFORM — Qyrǵyzstanda sheteldik tirkeý belgileri bar kólik quraldaryn 2026 jyldyń 1 qyrkúıegine deıin zańdastyrýǵa ruqsat berildi, dep habarlaıdy Kazinform agenttiginiń Bishkektegi menshikti tilshisi.
Tıisti jarlyqqa Qyrǵyzstan prezıdenti Sadyr Japarov qol qoıdy.
Qujatqa sáıkes, zańdastyrýdyń qosymsha protsedýrasy Qyrǵyzstanǵa tek 2024 jyldyń 31 jeltoqsanyna deıin kirgizilgen jáne memlekettik tirkeýden ótpegen kólik quraldarynyń belgili bir sanattaryna ǵana qoldanylady.
Kólik quraldarynyń júrgizýshileri mynalarǵa quqyly:
- Mınıstrler kabınetinde belgilengen tártipke sáıkes qosymsha (sońǵy) zańdastyrý protsedýrasynan ótýge;
- kólikti Qyrǵyz Respýblıkasynan tys jerlerge shyǵarýǵa;
- kólik quralyn qosalqy bólshekterge satýǵa;
- kólikti Mınıstrler kabınetinde belgilengen tártipke sáıkes joıýǵa;
Bul naýqan bir rettik, erekshe jáne sońǵy sıpatqa ıe ekendigi jáne ony uzartýǵa jatqyzylmaıtyny atap ótildi.
Osy merzim aıaqtalǵannan keıin kólik quraldaryn zańdastyrýǵa ruqsat etilmeıdi. Qyrǵyzstanda zańdastyrylmaǵan kólik quraldaryn paıdalanýǵa tyıym salyndy. Eger kólllik ıesi talaptardy belgilengen merzimde oryndamasa, kólik quraly Mınıstrler kabınetiniń belgilengen tártibimen sottyń sońǵy sheshimi negizinde jáne el zańnamasyna sáıkes saqtaý jáne keıinnen joıý úshin mamandandyrylǵan turaqqa qoıylady.
Eske salsaq, Qyrǵyzstanda 2025 jyldyń 1 sáýirinen bastap sheteldik nómirli kólikterdi zańdastyrý boıynsha aýqymdy naýqan júrgizildi.
