Qyrǵyzstanda shegirtkemen kúreste jańa preparat qoldanyla bastady

ASTANA. KAZINFORM — Qyrǵyzstanda shegirtkemen kúresý úshin jańa «Novakrıd» bıopreparaty qoldanylyp jatyr, dep habarlaıdy Kabar.

Qyrǵyzstan Aýyl sharýashylyǵy mınıstrliginiń habarlaýynsha, 2025 jylǵy 11–13 maýsym aralyǵynda BUU-nyń Azyq-túlik jáne aýyl sharýashylyǵy uıymynyń (FAO) baǵdarlamasy aıasynda jáne Qyrǵyz Respýblıkasynyń Ósimdikterdi hımııalandyrý, qorǵaý jáne karantın departamentiniń qoldaýymen shegirtke zııankesterimen kúreske arnalǵan jańa bıopestıtsıd — Novakrıd preparaty alǵash ret synaqtan ótkizildi.

Іs-sharanyń praktıkalyq bólimi Chúı oblysy Jaıyl aýdany Sýýsamyr aıyly ákimshiliginde ótti. Munda Novakrıd bıopestıtsıdi ıtalıan shegirtkesine qarsy qoldanyldy. Sharaǵa FAO ókilderi, Ózbekstannan kelgen halyqaralyq sarapshy jáne Ósimdikterdi qorǵaý jáne hımııalandyrý departamentiniń mamandary qatysty.

Mınıstrlik 2025 jylǵy 24–25 maýsym kúnderi aralyǵynda júrgizilgen aralyq tekserýler Novakrıd bıopreparatynyń joǵary tıimdiligin rastaǵanyn atap ótti.

Vedomstvo málimetinshe, Qyrǵyzstanda shegirtkeler jaıylymdarǵa jáne aýyl sharýashylyǵy daqyldaryna eleýli zııan keltiredi. El aýmaǵynda eń qaýipti eki úıirli túr keń taralǵan: ıtalıan shegirtkesi (Calliptamus italicus italicus L.) jáne marokko shegirtkesi (Dociostaurus maroccanus Thunb.). Shegirtke kóp taralǵan jyldary zııankesterge qarsy aýqymdy hımııalyq óńdeýler júrgiziledi.

— Hımııalyq preparattarǵa ekologııalyq jaǵynan qaýipsiz balama retinde entomopatogendi sańyraýqulaq Metarhizium acridum negizinde jasalǵan Novakrıd bıoınsektıtsıdi synaldy. Preparat shegirtkeniń damý kezeńderiniń bárinde — ımago, dernásil jáne jumyrtqa kezinde de tıimdi. Ol 6 aptaǵa deıin belsendiligin saqtaıdy jáne qorshaǵan ortaǵa, adamdarǵa, úı janýarlaryna jáne maqsatty emes jándikterge qaýipsiz sanalady, — delingen mınıstrlik habarlamasynda.

Budan buryn Qazaqstan men Qyrǵyzstan shekarasynda shegirtkege qarsy birlesken tekserý bastalǵanyn jazdyq.