Qyrǵyzstanda selden keıin kópir qırap, ondaǵan adam qaýipsiz jerge shyǵaryldy
ASTANA. KAZINFORM — Qyrǵyzstannyń Talas oblysyndaǵy «Besh-Tash» parkinde sel júrip, demalýshylar evakýatsııalandy, dep habarlaıdy Kabar.
Qyrǵyzstannyń Talas oblysyndaǵy «Besh-Tash» memlekettik tabıǵı parkiniń aýmaǵynda sel júrip, kópir men joldyń bir bóligin qıratyp ketti. Osyǵan baılanysty demalýshylar qaýipsiz jerge kóshirildi.
Tótenshe jaǵdaılar mınıstrliginiń málimetinshe, nóser jaýyn saldarynan tabıǵı park aýmaǵynda sel júrip, avtokólik kópiri men demalys aımaǵyna aparatyn joldyń bir bóligin shaıyp ketken.
Qutqarý jumystaryna Talas oblystyq TJM basqarmasynyń qyzmetkerleri jumyldyryldy.
— Joldyń arǵy betinde qalyp qoıǵan 50-ge jýyq azamat qutqarýshylardyń kómegimen qaýipsiz aımaqqa evakýatsııalandy. Zardap shekkender joq. Qazirgi ýaqytta tıisti qyzmetter jaǵdaıdy baqylap, keltirilgen shyǵyn kólemin anyqtap jatyr, — delingen vedomstvo habarlamasynda.
Sonymen qatar Osh qalasynda da sel saldaryn joıý jumystary júrgizilip jatyr.
TJM málimetinshe, Zymyryk-Saı aýdanynda Aq-Býýra — Aravan kanaly arqyly sel júrip, Saıdıev kóshesindegi balabaqsha aýlasyn jáne sharýashylyq joldardyń birqatar bóligin sý basqan.
Budan bólek, sel aǵyny ishinde adam bolǵan Daewoo Matiz markaly jeńil kólikti aǵyzyp áketken. Alaıda jergilikti turǵyndar der kezinde kómekke kelip, azamatty qutqaryp qalǵan. Keıin kólik te sýdan shyǵaryldy.
Tabıǵı apat saldaryn joıý jumystaryna jalpy sany 57 adam men 7 arnaıy tehnıka tartylǵan. Qazirgi ýaqytta zardap shekken aýmaqtardy tazalaý jáne qalpyna keltirý jumystary jalǵasyp jatyr.
Osydan buryn Qyrǵyzstan aýmaǵynda 5,0 magnıtýdaly jer silkinisi tirkelgeni belgili boldy.
