Qyrǵyzstanda sel júrdi
BІShKEK. KAZINFORM – Qyrǵyz Respýblıkasynyń birqatar óńirinde aýa raıynyń jylynýy men jaýǵan jaýynnyń saldarynan qar qarqyndy erip, sel júrdi.
Qyrǵyzstan Respýblıkasy Tótenshe jaǵdaılar mınıstrliginiń málimetinshe, Jalal-Abad oblysy Chatqal aýdany Qanysh-Qııa aıyl aımaǵynyń Jańa-Bazar, Aıǵyr-Jal jáne Qurylys aýyldarynda, Naryn oblysy At-Bashy aýdany Bash-Kaındı aıyl aımaǵyna qarasty Taldy-Sýý aýylyn sý shaıyp ótti. Sondaı-aq Shý oblysy Jaıyl aýdany Sýýsamyr aıyl aımaǵy Qaısar aýylynda, Ystyqkól oblysy Túp aýdany Q.Qarasaev aıyl aımaǵyna qarasty Toktoıan jáne Aq-Sýý aýdany Han-Táńiri aıyl aımaǵyna qarasty Sovetskoe aýylynda da laı kóshkini júrdi.
Keıbir aýyldarda tasqyn sý turǵyn úılerdiń aýlalary men joldardy buzyp ótkeni habarlandy.
Jergilikti jerlerde Tótenshe jaǵdaılar mınıstrliginiń qyzmetkerleri tótenshe jaǵdaıdyń saldaryn joıý úshin arnaıy tehnıkanyń kómegimen kúsheıtilgen tártipte jumys istep jatyr.
Aıta keteıik, ótken jyldyń tamyz aıynda Ystyqkóldegi selden 16 úıdi sý basyp, kópir qıraǵan bolatyn.