Qyrǵyzstanda sel saldaryn joıý jumystary jalǵasyp jatyr
ASTANA.KAZINFORM – Qyrǵyzstanda Osh, Batken, Jalal-Abad, Talas jáne Shý oblystarynda nóser jaýynannan keıingi sel saldaryn joıý jumystary jalǵasyp jatyr.
Qyrǵyzstan Respýblıkasy Tótenshe jaǵdaılar mınıstrliginiń habarlaýynsha, 24 sáýir kúni saǵat 00:20 shamasynda tolassyz jaýǵan jańbyrdan keıin Sozaq aýdany Qyzyl-Týý aýyldyq ákimshiligine qarasty Tashtak, Qyzyl-Seńgir, Boston aýyldarynda 150 turǵyn úı, 3 áleýmettik nysan, 1 kópir, aýlalar jáne 50 ga egistik jerdi sý basyp qaldy.
Tolassyz jaýǵan jańbyrdan keıin Bazar-Qorgon, Aqsy, Ala-Buqa, Tashkómir qalalarynda sel tirkelip, nátıjesinde ishki joldar men turǵyn úılerdiń aýlalaryn sý basqany atalyp ótti. Qazir Tótenshe jaǵdaılar mınıstrliginiń qyzmetkerleri jergilikti jerlerde belsendi jumys isteýde.
Qazirgi ýaqytta tasqynnan zardap shekken jergilikti turǵyndardyń úılerindegi sý motopompalar arqyly sorylyp jatyr. Turǵyndar qaýipsiz jerge kóshirildi. Tasqyn sýǵa túsken mal men qustyń ólekseleri órtelip, aýyldarda dezınfektsııalaý jumystary júrgizilýde. Oqıǵa ornyna Tótenshe jaǵdaılar mınıstrliginiń arnaıy ınjenerlik tehnıkasy jetkizilip, tasqyn arnalaryn tazalaý jumystary bastaldy.
Sondaı-aq, bir kún buryn Shý oblysynyń keıbir taýly aımaqtarynda sel bolǵany habarlandy. Shý aýdany, Óńbir-Jylǵa aýylyndaǵy Qaraǵul shatqalynda sý tasqyny boldy. Turǵyndar arasynda zardap shekkender joq. Qazirgi ýaqytta jaǵdaı turaqty.
Tolassyz jaýǵan jańbyr saldarynan Býrana aýyldyq okrýginde Býrana ózeni arnasynan asyp ketti. Osy ýaqytqa deıin Jańa-Jol jáne Aq-Beshim aýyldarynda birneshe ret sýarý aryqtary tazartylyp, kópirdiń aınalasy retke keltirildi. Sý tasqynynyń saldaryn joıýǵa jergilikti bılik pen Tótenshe jaǵdaılar mınıstrliginiń qyzmetkerleri jumyldyrylǵan.
Buǵan deıin Qyrǵyzstannyń úsh oblysynda sel saldarynan tótenshe jaǵdaı engizilgeni habarlanǵan bolatyn. Qyrǵyz Respýblıkasynyń Prezıdenti Sadyr Japarov tabıǵı apattan zardap shekken azamattarǵa tıisti kómek kórsetýdi tapsyrdy.
