Qyrǵyzstanda saılaýdan keıin jappaı tártipsizdik uıymdastyrmaq bolǵan 10 kúdikti ustaldy
ASTANA. KAZINFORM — Іshki ister mınıstrligi Jogorký Keneshke saılaýdan keıin jappaı tártipsizdikter uıymdastyrýǵa daıyndalyp júrgen destrýktıvtik toptyń qyzmetin toqtatty, dep habarlaıdy Kabar.
Vedomstvo habarlaǵandaı, topqa saıası qaıratkerler, burynǵy depýtattar, eks-memlekettik qyzmetshiler jáne quqyq qorǵaý organdarynyń qyzmetkerleri kirgen. Olar óz jaqtastaryn, sonyń ishinde uıymdasqan qylmystyq toptar men sporttyq qaýymdastyqtardy provokatsııalar men kúsh qoldaný áreketterine tartqan.
Ustalǵandar saılaýdyń nátıjeleri jarııalanǵannan keıin el boıynsha mıtıngiler uıymdastyrýdy josparlaǵan, bastapqyda ońtústikten bastap, keıin Bishkek pen oblystarda halyq narazylyǵyn halyq narazylyǵyn kórsetýdi maqsat etken. Olardyń josparyna konstıtýtsııaǵa qarsy úndeýler, ákimshilik ǵımarattardy, telearnalardy, quqyq qorǵaý organdary nysandaryn, qarý-jaraqty jáne qamaý oryndaryn basyp alý yqtımaldyǵy kirgen.
Topta árkimniń óz orny men mindeti anyqtalǵan. «Koordınatsııalyq toptar» saıası talaptardy bildirse, qylmystyq qurylymdar kúshtik qoldaýdy qamtamasyz etýi tıis bolǵan. Keıbir qatysýshylar ózara bolashaq laýazymdaryn aldyn ala bólisip qoıǵan.
Tekserý barysynda qarý-jaraq, oq-dáriler, granatalar, baılanys quraldary, 150 myń AQSh dollary kóleminde aqsha, tártipsizdikterdi qarjylandyrýǵa arnalǵan qujattar, is-qımyl jospary jáne esirtki zattary tárkilendi.
Ustalǵandarǵa — A.Ý. (1963 j. t.), S. T. (1998 j. t.), A.Sh. (1979 j. t.), E.E. (1983 j. t.), M.D. (1984 j. t.), Sh. T. (1986 j. t.), A.K. (1993 j. t.), A.Ý.E. (1993 j. t.), K.N. (1993 j. t.), K.K. (1970 j. t.) KR QK 278-babynyń 1-bóligi boıynsha (jappaı tártipsizdikter uıymdastyrýǵa daıyndyq, sonyń ishinde zorlyq-zombylyq, tonaý, órt qoıý jáne t. b.) aıyp taǵyldy. Fıgýranttar ýaqytsha ustaý ızolıatoryna qamaldy.
Qazirgi ýaqytta qylmystyq is aıasynda destrýktıvtik topqa qatysy bar basqa tulǵalardy jáne olardyń qarjylandyrýshylaryn anyqtaý maqsatynda birqatar tergeý-operatıvtik is-sharalar júrgizilip jatyr.
Eske sala ketsek, Qyrǵyz Respýblıkasy Prezıdentiniń 30 qyrkúıektegi jarlyǵymen Jogorký Kenesh depýtattarynyń merziminen buryn saılaýy 2025 jyldyń 30 qarashasy, jeksenbi kúni ótkiziledi.
Qyrǵyzstandaǵy parlament saılaýyna 467 kandıdat tirkeldi.
Qyrǵyz Respýblıkasynyń Saılaý jáne referendýmdar jónindegi ortalyq komıssııasy 5 qarashada Almaty, Taraz jáne Shymkent qalalarynda qosymsha úsh saılaý ýchaskesin qurý týraly qaýly qabyldady.
Buǵan deıin Qazaqstanda Qyrǵyz Respýblıkasynyń azamattary Astanadaǵy (QR-daǵy Qyrǵyzstan elshiligi), Almatydaǵy (QR-daǵy Qyrǵyzstannyń Bas konsýldyǵy) jáne Atyraý men Qaraǵandydaǵy ýchaskelerde daýys bere alatynyn habarlaǵan edik.
Buǵan deıin Qyrǵyzstanǵa parlamenttiń ózin-ózi taratýy ne úshin qajet ekenin jazǵan edik.
Qyrǵyzstanda 10 qarashadan bastap Jogorký Kenesh depýtattaryn merziminen buryn saılaýyna arnalǵan úgitteý naýqanynyń kezeńi bastaldy.
Ol 2025 jyldyń 10 qarashasynda bastalyp, 2025 jyldyń 29 qarashasynda tańǵy saǵat 8:00-de aıaqtalady. Úgit-nasıhat jınalystarda, mıtıngilerde, BAQ jáne onlaın basylymdar arqyly júrgizilýi múmkin. Saılaý komıssııalary úgit-nasıhat jumystary men saılaýshylarmen kezdesýlerdiń ótkizilýin qamtamasyz etýi tıis.
Aldaǵy kezekten tys parlament saılaýy kezinde qoǵamdyq tártipti saqtaý úshin Qyrǵyzstan quqyq qorǵaý organdarynyń 10 myńnan astam qyzmetkeri jumyldyrylady.