Qyrǵyzstanda saılaýaldy úgitteý naýqany bastaldy
BІShKEK. KAZINFORM – Qyrǵyzstanda 10 qarashadannn bastap Jogorký Kenesh depýtattaryn merziminen buryn saılaýyna arnalǵan úgitteý naýqanynyń kezeńi bastaldy, dep habarlaıdy Kazinform menshikti tilshisi.
Qyrǵyz Respýblıkasy OSK málimetinshe, saılaýaldy úgit-nasıhat 20 kúnge sozylady. Ol 2025 jyldyń 10 qarashasynda bastalyp, 2025 jyldyń 29 qarashasynda tańǵy saǵat 8:00-de aıaqtalady. Úgit-nasıhat jınalystarda, mıtıngilerde, BAQ jáne onlaın basylymdar arqyly júrgizilýi múmkin. Saılaý komıssııalary úgit-nasıhat jumystary men saılaýshylarmen kezdesýlerdiń ótkizilýin qamtamasyz etýi tıis.
Qyrǵyz Respýblıkasy aýmaǵynda taratylatyn sheteldik BAQ-ta saılaýaldy úgit-nasıhat júrgizýge tyıym salynady. Saılaý ótkizý kezeńinde sheteldik tele jáne radıo baǵdarlamalarynyń retranslıatsııasy jazylady.
Zańnamaǵa sáıkes, kelesi adamdarǵa úgit júrgizýge, kez kelgen úgit materıaldaryn shyǵarýǵa nemese taratýǵa tyıym salynady:
* memlekettik azamattyq jáne mýnıtsıpaldyq qyzmetkerler;
* Joǵarǵy Kenesh depýtattaryn qospaǵanda, memlekettik saıası laýazymdardy atqaratyn tulǵalar;
* jergilikti kenesh depýtattaryn qospaǵanda, arnaıy memlekettik jáne mýnıtsıpaldyq saıası laýazymdar;
* saılaý komıssııalarynyń músheleri;
* baqylaýshylar, halyqaralyq baqylaýshylar;
* dinı qaıratkerler;
* qaıyrymdylyq qyzmetimen aınalysatyn uıymdardyń negizin qalaýshylar jáne músheleri;
* 18 jasqa tolmaǵan tulǵalar
* sheteldik azamattar men uıymdar;
* azamattyǵy joq adamdar;
* jergilikti qoǵamdyq ózin-ózi basqarý organdarynyń qyzmetkerleri.
Eske sala ketsek, Qyrǵyz Respýblıkasy Prezıdentiniń 30 qyrkúıektegi jarlyǵymen Jogorký Kenesh depýtattarynyń merziminen buryn saılaýy 2025 jyldyń 30 qarashasy, jeksenbi kúni ótkiziletini bekitildi.
Qyrǵyzstandaǵy parlament saılaýyna 467 kandıdat tirkeldi. Al Qyrǵyzstan Respýblıkasynyń Saılaý jáne referendýmdar jónindegi ortalyq komıssııasy merziminen buryn parlamenttik saılaýǵa 127 halyqaralyq baqylaýshy akkredıttedi.
Qyrǵyz Respýblıkasynyń Saılaý jáne referendýmdar jónindegi ortalyq komıssııasy 5 qarashada Almaty, Taraz jáne Shymkent qalalarynda qosymsha úsh saılaý ýchaskesin qurý týraly qaýly qabyldady.
Buǵan deıin Qazaqstanda Qyrǵyz Respýblıkasynyń azamattary Astanadaǵy (QR-daǵy Qyrǵyzstan elshiligi), Almatydaǵy (QR-daǵy Qyrǵyzstannyń Bas konsýldyǵy) jáne Atyraý men Qaraǵandydaǵy ýchaskelerde daýys bere alatynyn habarlaǵan edik.
Buǵan deıin Qyrǵyzstanǵa parlamenttiń ózin-ózi taratýy ne úshin qajet ekenin jazǵan edik.