Qyrǵyzstanda sábı ólimi áli de joǵary deńgeıde qalyp otyr

BІShKEK. KAZINFORM — Qyrǵyzstanda náreste ólimi kórsetkishi azdap tómendegenimen, áli de joǵary deńgeıde saqtalyp otyr. Bul týraly Elektrondy densaýlyq saqtaý ortalyǵynyń materıaldarynda aıtyldy, dep jazdy 24 kg.

2024 jyly túrli aýrý, ýlaný sondaı-aq jaraqat saldarynan bir jasqa deıingi 1 836 náreste kóz jumǵan. Bul — tiri týǵan árbir myń balaǵa shaqqanda 13,1 jaǵdaı. 2023 jylmen salystyrǵanda bul kórsetkish sál tómen: sol jyly 2 040 náreste baqılyq bolǵan.

Qyrǵyzstan boıynsha náreste óliminiń negizgi sebebi — perınataldyq kezeńde (júktilik pen bosaný kezindegi jáne odan keıingi alǵashqy aptadaǵy) paıda bolatyn aýrýlar men jaǵdaılarmen tikeleı baılanysty ekeni aıtylǵan, olardyń úlesi 69,8 paıyzdy quraıdy. Ekinshi orynda — týa bitken aqaýlar (17,2%), úshinshi orynda — tynys alý organdarynyń aýrýlary (8,3%).

Bes jasqa deıingi balalar arasyndaǵy ólim kórsetkishi ótken jyly árbir myń tiri týǵan balaǵa shaqqanda 15,9 jaǵdaıdy qurap, 2023 jylmen salystyrǵanda 3,6 paıyzǵa tómendegen. Bul sanattaǵy ólim sebepteri de negizinen sol — perınataldyq kezeńdegi aýrýlar, týa bitken anomalııalar jáne tynys alý júıesiniń aýrýlary.

Al Qazaqstanda sábı ólimi byltyrǵy jylmen salystyrǵanda 20,2%-ǵa tómendedi.