Qyrǵyzstanda róli oń jaqtan sol jaqqa aýystyrylǵan kólikterdi zańdastyrý usynyldy
ASTANA. KAZINFORM — Qyrǵyzstanda róldik basqarý júıesi oń jaqtan sol jaqqa aýystyrylǵan kólikterdi zańdastyrýǵa ruqsat berilýi múmkin, dep habarlaıdy Kazinform agenttiginiń Bishkektegi menshikti tilshisi.
Tıisti zań jobasy qoǵamdyq talqylaýǵa shyǵaryldy.
Bastama sheteldik memlekettik nómirli kólikterdi zańdastyrýdyń qazirgi qorytyndy kezeńi aıasynda qaralyp otyr. Ol 10 maýsymda bastalyp, 2026 jylǵy 1 qyrkúıekte aıaqtalady.
Qazirgi ýaqytta Qyrǵyzstanda jeke maqsatta paıdalanylatyn osyndaı shamamen 50 kólik bar. Olardy tirkeý úshin kólikterge tehnıkalyq baǵalaý júrgizilip, tıisti qorytyndy alý qajet.
Tehnıkalyq saraptamany Qyrǵyzstan ІІM Jol qozǵalysy qaýipsizdigin qamtamasyz etý bas basqarmasynyń «Tehnıkalyq maqsattaǵy ortalyq» memlekettik kásiporny júrgizedi. Saraptama nátıjesinde kólik ıesine onyń tehnıkalyq jaǵdaıy týraly qorytyndy beriledi. Eger kólik qaýipsizdik talaptaryna saı emes dep tanylsa, ony tirkeýden bas tartylýy múmkin.
Eske sala keteıik, Qyrǵyzstanda 2025 jylǵy 1 sáýir men 1 qazan aralyǵynda sheteldik nómirli kólikterdi zańdastyrý boıynsha alǵashqy aýqymdy naýqan ótti.
Buǵan deıin Qyrǵyzstan bıligi sheteldik nómirli kólikterdi zańdastyrý úshin 2026 jylǵy 1 qyrkúıekke deıin sońǵy múmkindik bergeni habarlanǵan bolatyn.
Sondaı-aq Qyrǵyzstan ulttyq agregator taksı qyzmetin iske qosatyny da aıtyldy.
