Qyrǵyzstanda psıhologııalyq kómekke júginetinder kóbeıip barady

ASTANA. KAZINFORM — Qyrǵyzstannyń densaýlyq saqtaý mınıstri Erkın Checheıbaev el halqynyń 11%-y resmı túrde psıhıkalyq aýrýlarmen aýyratynyn málimdedi, dep habarlaıdy Kabar.

Onyń aıtýynsha, bul derekter eldegi psıhıatrııalyq mekemelerge júgingen adamdar sanyna negizdelgen. Statıstıkaǵa depressııa, kúızelistik buzylys, nevroz, dúrbeleń ustamalary jáne basqa da dert kiredi.

Mınıstrdiń aqparatynsha, mundaı úrdis tek Qyrǵyzstanǵa ǵana tán emes, uqsas dınamıka álemniń kóptegen elinde baıqalady. Adamdar jıi mazasyzdyq pen emotsııalyq shamadan tys júktemeni bastan ótkeredi, ásirese aýyr jaǵdaıdan nemese kúızelisten keıin. Bul olardy psıhologtar men psıhıatrlarǵa júginýge ıtermeleıdi.

— Aqparattyq stress psıhıkaǵa túsetin negizgi qysym faktory. Júginýler sanynyń ósý sebebi qazirgi adamǵa aǵylatyn qýatty aqparattyq aǵym. Kez kelgen memlekettiń aqparattyq keńistigindegi kontenttiń 60%-yna deıingi bóligi negatıvti jańalyqtar, olar psıhıkaǵa áldeqaıda qatty áser etedi, — deıdi mınıstr.

Checheıbaevtyń aıtýynsha, aýdıtorııa men laık úshin básekelesetin BAQ pen blogerler kóbine negatıvti materıaldardy taratady. Sonyń saldarynan adam kún saıyn jergilikti oqıǵalardan bastap álemdik qaqtyǵystarǵa deıingi kóptegen mazasyz jańalyqqa tap bolady.

Mınıstrdiń aıtýynsha, adam mıy únemi kúızelis jaǵdaıynda júrýge májbúr.

— Kún saıyn biz úlken-keshi 500–700 sheshim qabyldaımyz. Tipti dúkendegi sýsyndy tańdaý mıǵa qosymsha júkteme túsiretin sheshim, — deıdi ol.

Densaýlyq saqtaý mınıstri qazirgi zamannyń basty máseleleriniń biri psıhologııalyq sharshaý ekenin atap ótti.

Aqparattyq júkteme, turmystyq kúızelis jáne jahandyq oqıǵalar adamnyń emotsıonaldyq resýrstaryn birtindep sarqytatyn jalpy fon qalyptastyrady. Mınıstrdiń aıtýynsha, osynyń ózi adamdardyń kásibı kómekke jıi júginýiniń bir sebebi.

Aıta ketelik elimizdiń barlyq óńirinde psıhologııalyq qoldaý ortalyqtary jumys isteıdi.