Qyrǵyzstanda prezıdenttik saılaýǵa ázirge birde-bir ótinish túspegen
ASTANA. KAZINFORM — Qyrǵyzstannyń Ortalyq saılaý jáne referendým ótkizý komıssııasyna ázirge prezıdenttikke úmitker bolýǵa nıetti azamattardan birde-bir ótinish túspegen, dep habarlaıdy Kazinform agenttigi 24.kg basylymyna silteme jasap.
Bul týraly Qyrǵyzstan Ortalyq saılaý komıssııasynyń tóraǵasy Tynchtyk Shaınazarov málimdedi.
Onyń aıtýynsha, ótinishterdi qabyldaý 13 qarashaǵa deıin jalǵasady. Odan keıin komıssııa kandıdattardy tirkep, saılaýǵa daıyndyqty jalǵastyrady.
Buǵan deıin «Qyrǵyztest» ortalyǵy Qyrǵyzstan prezıdenttigine úmitker bolýy múmkin eki azamat memlekettik tildi bilý deńgeıin anyqtaý testinen ótkenin habarlaǵan. Alaıda belgilengen tártipke sáıkes, olardyń esimderi men test nátıjeleri jarııalanbaıdy. Keıbir málimetter boıynsha, emtıhandy Qyrǵyzstannyń burynǵy ishki ister mınıstri Ómúrbek Sývanalıev pen Qarjy polıtsııasynyń burynǵy basshysy Syımyk Japykeev tapsyrýy múmkin.
Eske sala keteıik, 24 qyrkúıekte Qyrǵyzstan parlamenti prezıdent saılaýyn taǵaıyndaý týraly qaýly jobasyn qabyldady. Qujatqa sáıkes, saılaý 2027 jylǵy 27 qańtarda ótedi.
Qazirgi prezıdent Sadyr Japarov aldaǵy saılaýǵa qatysýǵa nıetti ekenin málimdedi. Sondaı-aq Ómúrbek Sývanalıev pen Syımyk Japykeev te prezıdenttik saılaýǵa qatysý josparlary bar ekenin habarlaǵan.
Buǵan deıin Qyrǵyzstandaǵy prezıdent saılaýyna qansha qarajat jumsalatynyn habarlaǵan bolatynbyz.
