Qyrǵyzstanda prezıdent saılaýyna neshe adam tirkeldi
ASTANA. KAZINFORM — Qyrǵyzstanda Saılaý jáne referendýmdar jónindegi ortalyq komıssııa prezıdent saılaýyna qatysatyn saılaýshylardyń aldyn ala tizimin jarııalady, dep habarlaıdy Kazinform agenttiginiń Bishkektegi menshikti tilshisi.
Ortalyq komıssııanyń málimeti boıynsha, aldyn ala búkil el boıynsha 4 467 040 saılaýshy bar. Saılaýshylardyń aralyq tizimi qaǵazǵa basyp shyǵarylyp, 2026 jyldyń 18 qarashasyna deıin 2492 saılaý ýchaskesine ilinedi.
Tizimderdi «Qyzmat» memlekettik mekemesi Biryńǵaı memlekettik halyq tizilimindegi aqparat negizinde qurastyryp, «Tızme» portalynda (tizme.gov.kg) jarııalady. Olar kún saıyn jańartylyp otyrady.
Azamattar ózderiniń saılaýshylar tizimindegi aty-jónin 2027 jyldyń 12 qańtaryna deıin «tizme.gov.kg» saıtynda, saılaý ýchaskesinde, 1255 nemese 119 nómirlerine qońyraý shalyp jáne 119 nómirine PIN-kodpen SMS jiberip teksere alady.
Tizimde joq jáne bıometrııalyq tirkeýden ótpegen Qyrǵyzstan azamattary osy protsedýradan ótip, Halyqqa qyzmet kórsetý ortalyqtaryndaǵy tólqujat málimetterin jańarta alady.
Eske salaıyq, Qyrǵyzstandaǵy kelesi prezıdent saılaýy 2027 jyldyń 27 qańtaryna josparlanǵan.
Qyrǵyzstan Ortalyq saılaý komıssııasynyń dereginshe, prezıdent saılaýyna barlyǵy 1,2 mlrd som (shamamen 6,06 mlrd teńge) jumsalmaq.
