Qyrǵyzstanda prezıdent saılaýy qashan ótedi
ASTANA. KAZINFORM — Qyrǵyzstanda prezıdent jáne parlament depýtattaryn saılaý kúnin jeksenbiden sársenbige aýystyrý týraly sheshim qabyldandy, dep habarlaıdy Kazinform agenttiginiń Bishkektegi menshikti tilshisi.
Tıisti zań jobasyn Jogorký Kenesh depýtattary maquldady.
Parlament spıkeri Marlen Mamatalıev qabyldanǵan zańnamalyq túzetýlerge sáıkes kezekti prezıdent saılaýy 2027 jylǵy 27 qańtarda, ıaǵnı qańtardyń sońǵy sársenbisinde ótetinin málimdedi.
Jańashyldyqtyń basty maqsaty – saılaýshylardyń belsendiligin arttyrý jáne kvorýmdy jaqsartý. Óıtkeni iri qalalarda jeksenbi kúnderi saılaýǵa qatysý deńgeıi dástúrli túrde tómen bolyp kelgen.
Sonymen qatar daýys berý kúni resmı túrde demalys kúni bolyp jarııalanady. Uıymnyń menshik nysanyna qaramastan barlyq qyzmetkerdiń jalaqysy tolyq saqtalady jáne ol kádimgi jumys kúni retinde tólenedi.
Alaıda saılaý kúni úshin jalaqy alý úshin qyzmetkerdiń daýys berýge qatysýy mindetti shart. Eger azamat dáleldi sebepsiz saılaýǵa kelmese, jumys berýshi bul kún úshin tólem jasamaıdy jáne ol kún aqy tólenbeıtin demalys kúni bolyp esepteledi.
Buǵan deıin Qyrǵyzstandaǵy kezekti prezıdent saılaýy 2027 jylǵy 24 qańtarǵa belgilengeni habarlanǵan bolatyn.
Aıta ketelik Qyrǵyzstannyń eńbek mıgranttaryna parlament saılaýyna qatysýǵa ruqsat berilýi múmkin.
