Qyrǵyzstanda prezıdent saılaýy 2027 jyly ótedi
ASTANA. KAZINFORM – Qyrǵyzstannyń Konstıtýtsııalyq soty Sadyr Japarovtyń usynysy negizinde Konstıtýtsııanyń prezıdent ókilettigi merzimine qatysty baptaryna resmı túsindirme berdi, dep habarlaıdy Kazinform agenttiginiń menshikti tilshisi.
Sottyń túsindirýine sáıkes, bastalǵan prezıdenttik merzimi bastapqyda belgilengen alty jyl ishinde aıaqtalýy tıis. Sonymen qatar, qazirgi prezıdenttiń alty jyldyq merzimi eki merzim qaǵıdatyna sáıkes birinshi merzim bolyp esepteledi.
Prezıdenttiń kezekten tys saılaýy ókilettiktiń merziminen buryn toqtatylýynyń quqyqtyq saldary retinde ǵana múmkin. Mundaı negizderge óz erkimen otstavkaǵa ketý, belgilengen tártippen qyzmetinen shettetilý, densaýlyq jaǵdaıyna baılanysty ókilettigin júzege asyra almaý nemese qaıtys bolý jatady. Túsindirmede kezekten tys saılaý stsenarııi zań júzinde joqqa shyǵarylatyny atap ótilgen.
— Qyrǵyz Respýblıkasynyń kezekti prezıdent saılaýy 2027 jylǵy qańtardyń tórtinshi jeksenbisinde — 2027 jylǵy 24 qańtarda ótkizilýi tıis. Al saılaýdy taǵaıyndaý Jogorký Kenesh tarapynan daýys berý kúnine deıin keminde tórt aı buryn, ıaǵnı 2026 jylǵy 24 qyrkúıekten keshiktirilmeı júzege asyrylýy qajet, — delingen sot túsindirmesinde.
Eske salaıyq, 2025 jylǵy sáýirde Jogorký Kenesh depýtattary «QR Prezıdentin jáne Jogorký Kenesh depýtattaryn saılaý týraly» konstıtýtsııalyq zańǵa kelesi prezıdent saılaýynyń merzimin naqtylaıtyn túzetýlerdi úsh oqylymda qabyldaǵan bolatyn.
Eske salsaq Qyrǵyzstanda Jogorký Kenesh depýtattardyń kezekten tys saılaýy aıaqtaldy.