Qyrǵyzstanda parlament saılaýyna kandıdattardy usyný aıaqtalýǵa jaqyn
ASTANA. KAZINFORM – Qyrǵyz Respýblıkasynyń Ortalyq saılaý komıssııasy 2025 jylǵy 30 qazanda Jogorký Kenesh depýtattaryn merziminen buryn saılaýǵa kandıdattardan ótinish qabyldaýdy aıaqtaıdy, dep habarlaıdy Kazinform agenttiginiń menshikti tilshisi.
QR OSK deregi boıynsha, 2025 jylǵy 30 qarashada ótetin saılaýǵa qatysýǵa nıet bildirgen azamattardan ótinishti qabyldaý merzimi – 30 qazan kúni saǵat 18:00-ge deıin.
Depýtattyqqa úmitkerler 2 qarashaǵa deıin qujattardyń tolyq paketin usynýy kerek. Kandıdattardy tirkeý 9 qarashada aıaqtalyp, 10 qarashadan saılaý aldyndaǵy úgit nasıhat jumystary bastalady.
Shet elde turatyn jáne ózge elde júrgen qyrǵyz azamattary úshin álemniń 34 elinde 97 sheteldik saılaý ýchaskesi quryldy. Qazaqstanda Qyrǵyz Respýblıkasynyń azamattary Astanadaǵy (QR-daǵy Qyrǵyzstan elshiligi), Almatydaǵy (QR-daǵy Qyrǵyzstannyń Bas konsýldyǵy) jáne Atyraý men Qaraǵandydaǵy ýchaskelerde daýys bere alady.
Qyrǵyzstannyń saılaý jáne referendýmdar jónindegi ortalyq komıssııasy kezekten tys parlament saılaýyn baqylaý úshin 29 halyqaralyq baqylaýshyny akkredıttegen.
Qyrǵyz Respýblıkasynyń prezıdenti aldaǵy parlamenttik saılaýdy basynan aıaǵyna deıin tóreshi retinde jeke ózi qadaǵalaıtynyn málimdedi.