Qyrǵyzstanda parlament saılaýy ótip jatyr

ASTANA. KAZINFORM – Búgin, 30 qarasha kúni, Qyrǵyzstanda Jogorký Keneshke 30 saılaý okrýgi boıynsha kezekten tys parlament saılaýy ótip jatyr. Daýys berý jergilikti ýaqytpen 08:00-de bastalyp, 20:00-ge deıin jalǵasady, dep habarlaıdy Kabar.

Qyrǵyzstannyń Ortalyq saılaý komıssııasynyń málimetinshe, saılaý ýchaskeleri eldiń barlyq óńirinde ashyq. Onda baqylaýshylar, ýchaskelik komıssııa qyzmetkerleri jáne quqyq qorǵaý organdarynyń ókilderi jumys istep jatyr. Bıylǵy saılaý majorıtarlyq júıe boıynsha ótýde: ár okrýgten úsh kandıdat parlamentke ótedi.

OSK saılaý zańnamada qarastyrylǵan barlyq rásimderge saı uıymdastyrylǵanyn, onyń ishinde elektrondy sáıkestendirý júıeleriniń qoldanylyp jatqanyn atap ótti. Ýchaskeler jabylǵannan keıin daýystardy sanaý bastalady, aldyn ala nátıjeler 1 jeltoqsanǵa qaraǵan túni jarııalanýy múmkin.

29 qarashada Qyrǵyzstanda jergilikti ýaqytpen 08:00-de kandıdattardyń saılaýaldy úgit-nasıhaty aıaqtalyp, «tynyshtyq kúni» ótti.

Buǵan deıin habarlanǵandaı, Jogorký Kenesh depýtattaryn kezekten tys saılaýǵa 467 kandıdat tirkelgen, olardyń altaýy keıinirek saılaýǵa qatysýdan bas tartty. Jalpy akkredıttelgen halyqaralyq baqylaýshylar sany – 788 adam.

Eske salaıyq, Qazaqstanda Qyrǵyzstan azamattary úshin Astana (QR-daǵy Qyrǵyzstan Elshiligi), Almaty (QR-daǵy Qyrǵyzstan Bas konsýldyǵy), Atyraý jáne Qaraǵandy qalalarynda saılaý ýchaskeleri ashylǵan edi. Sonymen qatar, 5 qarashada Almaty, Taraz jáne Shymkent qalalarynda qosymsha úsh ýchaske qurylǵan.