Qyrǵyzstanda Parlament qurýdyń jańa tetigi qarastyrylyp jatyr
ASTANA. KAZINFORM - Qyrǵyzstanda Jogorký Kenesh depýtattaryn saılaý rásimin ózgertý usynylady, dep habarlaıdy Kazinform agenttiginiń menshikti tilshisi.
Zańnyń tıisti jobasyn Qyrǵyzstan parlamenti depýtattarynyń toby qoǵamdyq talqylaýǵa engizdi.
Bul qujat Jogorký Kenesh (JK) depýtattaryn saılaý rásimin jetildirý, saıası sybaılas jemqorlyqtyń aldyn alý, qoldanystaǵy saılaý júıesiniń kemshilikterin joıý, sondaı-aq azamattardyń halyq qalaýlylaryna degen senim deńgeıin arttyrý maqsatynda ázirlendi.
Túzetýlerge sáıkes, Qyrǵyz Respýblıkasy Jogorký Keneshiniń depýtattaryn saılaý úshin 30 kóp mandatty aýmaqtyq saılaý okrýgin qurý usynylady, olardyń árqaısysynda 3 depýtattan saılanady. Sonymen qatar, parlamenttiń barlyq 90 depýtaty majorıtarlyq júıe boıynsha saılanady. Qazirgi ýaqytta Jogorký Keneshtiń 54 depýtaty biryńǵaı saılaý okrýginde proportsıonaldy júıe boıynsha, al 36 depýtat bir mandatty saılaý okrýgterinde majorıtarlyq júıe boıynsha saılanady.
Kóp mandatty aýmaqtyq saılaý okrýgteri boıynsha Jogorký Kenesh depýtattyǵyna kandıdattardy usyný quqyǵy saıası partııalarǵa jáne azamattardyń ózin-ózi usynýy arqyly tıesili.
Saıası partııalar ár kóp mandatty aýmaqtyq saılaý okrýgi boıynsha Jogorký Kenesh depýtattyǵyna bir kandıdatty partııa sezinde jasyryn daýys berý arqyly usynady. Ózin-ózi usyný tártibimen Jogorký Kenesh depýtattyǵyna kandıdat tek bir saılaý okrýginde ǵana usynyla alady.
Kóp mandatty aýmaqtyq saılaý okrýgteri boıynsha Jogorký Keneshke kandıdattardy usyný kezinde saıası partııa bir jynysty kandıdattardyń úlesi 70%-dan aspaýyn qamtamasyz etýge mindetti.
Ózgeristerge sáıkes, 30 depýtattyq mandat áıelder kvotasyna tıesili.
Jogorký Kenesh depýtatynyń ókilettigi merziminen buryn toqtatylǵan jaǵdaıda, onyń mandaty tıisti kóp mandatty aýmaqtyq saılaý okrýginde saılaýǵa qatysqan saılaýshylardyń eń kóp daýysyn alǵan, saılanǵan depýtattardan keıingi kelesi kandıdatqa beriledi.
Eske salsaq Qyrǵyzstanda jańa mınıstrlik pen memlekettik agenttik qurylǵan edi.