Qyrǵyzstanda ótetin VI Dúnıejúzilik kóshpendiler oıyndaryna 100 kún qaldy
ASTANA.KAZINFORM - Qyrǵyzstan VI Dúnıejúzilik kóshpendiler oıyndaryna daıyndyqty kúsheıtip jatyr, dep habarlaıdy Kazinform agenttiginiń Bishkektegi tilshisi.
Bishkekte dúnıejúzilik kóshpendiler oıyndaryna neshe kún qalǵanyn kórsetip turatyn elektrondy keri sanaq taqtasy iske qosyldy.
Qyrǵyzstan Respýblıkasy Mınıstrler Kabıneti tóraǵasynyń orynbasary Ulan Mamatkanov Oıyndardyń 31 tamyzda – Qyrǵyzstan Respýblıkasynyń Táýelsizdik kúninde ashylatynyn habarlady.
-Dúnıejúzilik kóshpendiler oıyndaryn bastaý arqyly Qyrǵyzstan urpaqtan-urpaqqa berilip kele jatqan ejelgi ata-babalarymyzdyń sporttyq jarystaryn qaıta jandandyryp qana qoımaı, búkil álemdegi kóshpendi mádenıetti biriktirdi. Qalǵan 100 kún Oıyndardy eń joǵary halyqaralyq deńgeıde ótkizýdiń ortaq maqsatyn bólisetin barlyq uıymdastyrýshylar úshin úlken jaýapkershilik pen patrıotızm kezeńi bolady, - dep atap ótti ol.
Qyrǵyz Respýblıkasynyń Mádenıet, aqparat jáne jastar saıasaty mınıstrligi VI Dúnıejúzilik kóshpendiler oıyndary kóshpendi halyqtardyń mádenıetin, dástúrli sport túrlerin jáne rýhanı murasyn jahandyq deńgeıde nasıhattaýǵa baǵyttalǵan biregeı halyqaralyq joba ekenin atap ótti.
«100 kún qaldy» taqtasyn ornatý - daıyndyqtyń sońǵy kezeńiniń sımvolıkalyq bastamasy.
Buǵan deıin 60-tan astam el VI Dúnıejúzilik kóshpendiler oıyndaryna qatysatynyn rastaǵany habarlanǵan bolatyn.
Sondaı-aq, biz 2026 jylǵy Dúnıejúzilik kóshpendiler oıyndarynyń talısmany retinde qar barysy tańdalǵanyn habarladyq.
