Qyrǵyzstanda ótetin kóshpendiler oıyny tizimine qazaqtyń kókpary endi
ASTANA.KAZINFORM — Qyrǵyzstanda ótetin VI Dúnıejúzilik kóshpendiler oıynynyń resmı baǵdarlamasyna qazaqtyń kókpary endi. Bul týraly «Qazaqstan Kókpar Federatsııasynyń» prezıdenti Aıdarbek Qojanazarov habarlady.
Buǵan deıin oıyndar tiziminde kókpardyń bolmaýy qoǵamda keń talqylaý týdyrǵan edi.
— Týrızm jáne sport mınıstrligimen birlesip, qyrǵyzstandyq áriptestermen talqylaı kele osyndaı sheshimge qol jetkizdik. Kókpar da, kók bóri de qazaq pen qyrǵyzdyń ulttyq bolmysyn aıqyndaıtyn negizgi sport túrleri. Bul — tek oıyn emes, urpaqtar sabaqtastyǵy, ortaq mádenı kod. Sondyqtan mundaı halyqaralyq jarystarda sport dostyq pen birliktiń nyshany bolýy kerek, — dedi Qojanazarov.
Ótken jyly oıyndar tizimi shyqqanda kókpar Kóshpendiler oıyndary baǵdarlamasyna enbegen edi, tek kókbóri bolǵan. Bul basqa qatysýshy elder úshin de mańyzǵa ıe, sebebi kókpardy Qazaqstannan bólek oıynǵa keletin Mońǵolııa, Ózbekstan, Tájikstan, Aýǵanstan sııaqty birqatar elde de keńinen taralǵan.
VI Dúnıejúzilik kóshpendiler oıyndary 2026 jylǵy 31 tamyz ben 6 qyrkúıek aralyǵynda Qyrǵyzstanda ótedi. Jarys baǵdarlamasyna 43 ulttyq sport túri engizilgen. Oıyndarǵa shamamen 100 eldiń qatysýy kútilip otyr.
Aıta keteıik, ótken jyldyń shildesinde Qyrǵyzstanda ótetin dúnıejúzilik kóshpendiler oıyndary tiziminen qazaq kókpary alynyp tastaldy degen aqparat taraǵan edi.
Budan buryn qyrǵyzstandyq sportshy Aısýlýý Tynybekova VI Dúnıejúzilik kóshpendiler oıyndarynyń ambassadory (elshisi) atanǵanyn jazǵan edik.