Qyrǵyzstanda ótetin dúnıejúzilik kóshpendiler oıyndarynda qazaq kókpary bolmaı ma

ASTANA. KAZINFORM — Birneshe kún buryn Qyrǵyzstanda ótetin dúnıejúzilik kóshpendiler oıyndary tiziminen qazaq kókpary alynyp tastaldy degen aqparat tarady. Osy oraıda elimizdiń Týrızm jáne sport mınıstrligine suraý salǵan edik.

— 2026 jylǵy qyrkúıek aıynda Qyrǵyzstan Respýblıkasynda ótetin VI dúnıejúzilik kóshpendiler oıyndary halyqtar arasyndaǵy mádenı baılanysty nyǵaıtýǵa jáne etnıkalyq sport túrlerin jahandyq deńgeıde damytýǵa jańa serpin berýge baǵyttalǵan. Búginge deıin uıymdastyrýshy taraptan VI dúnıejúzilik kóshpendiler oıyndarynyń resmı erejesi men shaqyrý haty kelip túsken joq, — degen jaýap aldyq resmı saýalǵa.

Osy oraıda mınıstrlik Qyrǵyz Respýblıkasynyń Sport jáne dene shynyqtyrý isteri jónindegi memlekettik agenttigine VI dúnıejúzilik kóshpendiler oıyndaryn ótkizý erejesin joldaý jóninde resmı hat jibergen.

— Túrkııa men Qazaqstanda ótken sońǵy eki dúnıejúzilik kóshpendiler oıyndarynda kókpar oıyny kórermender men qatysýshylardyń zor qyzyǵýshylyǵyna ıe bolǵanyn atap ótken jón, — delingen habarlamada.

Sondaı-aq vedomstvonyń habarlaýynsha, qazir elimizde Qyrǵyzstanda ótetin VI dúnıejúzilik kóshpendiler oıyndaryna qatysatyn ulttyq sport túrleri boıynsha sportshylardy irikteý júrip jatyr.

— Ulttyq sport túrlerinen qurama komandalardy daıyndaý úshin respýblıkalyq deńgeıde úılestirý jumystaryn «Ulttyq jáne at sporty túrleri ortalyǵy» respýblıkalyq memlekettik qazynalyq kásiporny júzege asyrady, — deıdi Týrızm jáne sport mınıstrliginen.

Eske sala ketsek, byltyr elordada V dúnıejúzilik kóshpendiler oıyndary ótti. Eske qalǵan erekshe sáttermen siltemege ótip tanysýǵa bolady.