Qyrǵyzstanda otbasylyq merekeler men toı-dýmandardy ótkizýdiń erejesi engizilmek

ASTANA. KAZINFORM – Qyrǵyzstanda otbasylyq toı-joralǵylar men as berý rásimderin ótkizý tártibin retteıtin jańa qujat ázirlendi. Basty maqsat – daraqylyq pen dańǵoılyqqa jol bermeı, orynsyz shyǵyndy tejeý. Bul týraly Kazinform agenttiginiń menshikti tilshisi habarlaıdy.

Qyrǵyz Respýblıkasynyń Mınıstrler kabıneti usynǵan qaýly jobasy qazir qoǵam talqylaýyna shyǵaryldy.

Qujat avtorlarynyń aıtýynsha, usynylyp otyrǵan sharalar qoǵamdaǵy áleýmettik kelisimdi nyǵaıtyp, shamadan tys shyǵynnan týyndaıtyn áleýmettik qysymdy azaıtýǵa jáne azamattardyń ómir sapasyn arttyrýǵa baǵyttalǵan.

Jobaǵa sáıkes, tártip tómendegi otbasylyq saltanattar men joralǵylarǵa qoldanylady:
– úılený toılary;
– qalyńdyqty uzatý;
– besikke salý, tusaýkeser, súndet toıy;
– dinı rásimder: «Qajylyq», «Umra»;
– jerleý jáne as berý (úshi, jetisi, qyrqy, jyldyq asy).

Toılar men ózge de otbasylyq merekelerdi ótkizý kezinde:
– qonaq sanyn 200 adammen shekteý;
– 350 adamnan asatyn asta-tók toı ótkizbeý;
– bir iri qara nemese bir jylqy soıýmen shektelý;
– toıdy jas jubaılar men ata-ananyń naqty qarjylyq múmkindigine saı, nesıe men qaryzsyz ótkizý usynylady.

Sonymen qatar, mynadaı áreketterge jol berilmeıdi:
– úsh kólikten asatyn toı kortejderi;
– otshashýlar men shekten tys shoý-baǵdarlamalar;
– qymbat syılyqqa májbúrleý;
– kıim syılaý, syı-syıapat salynǵan sebet tartý, arnaıy as berý sekildi ysyrapshyl dástúrler.

Al jerleý men as berý rásimderine qatysty:
– jerleý kúni mal soımaı, qatysýshylar sanyn shektemeı ótkizý;
– jyldyq asty mindetti emes, erikti túrde uıymdastyrý;
– keıingi as berýlerde usaq mal soıýǵa nemese uıymdastyrýshylardyń qalaýyna qaraı bir jylqy ne bir iri qara soıýǵa ruqsat;
– as bergenniń ornyna qaıyrymdylyqpen aınalysyp, meshitke nemese qoǵamdyq muqtajdyqtarǵa sadaqa berý usynylady.

Qujatty ázirleýshiler bul bastama azamattardyń salt-dástúrdi atqarý erkindigin shekteý emes, qaıta olardyń áleýmettik-ekonomıkalyq jaǵdaıyn eskergen aqylǵa qonymdy, teńgerimdi ári jaýapty kózqaras qalyptastyrýdy kózdeıtinin atap ótedi.

Aıta keteıik, buǵan deıin Qyrǵyzstanda marqumdarǵa eskertkish pen qulpytas ornatý tártibin retteıtin nusqaýlyq ázirlengen bolatyn. Al 2025 jyldyń aqpan aıynda Mınıstrler kabıneti jerleý jáne zırattaǵy qurylystardy ornatý tártibin resmı túrde bekitti.

Osyǵan deıin Qyrǵyzstan kólik saýdasyna salynatyn salyqty alyp tastaǵan bolatyn.