Qyrǵyzstanda Ortalyq Azııa memleketteriniń ІІІ Parlamentaralyq forýmy ótedi

ASTANA. KAZINFORM – 23 qyrkúıekte Bishkekte Ortalyq Azııa memleketteriniń ІІІ Parlamentaralyq forýmy ótedi. Onyń taqyryby – «Ortalyq Azııa elderiniń parlamentteri: aımaqty keshendi damytýdyń tıimdi sheshimderi», - dep habarlaıdy Kazinform menshikti tilshisi Qyrǵyzstan Respýblıkasy Jogorký Kenesh baspasóz qyzmetine silteme jasap. 

Іs-sharaǵa Ortalyq Azııa elderiniń parlament basshylary qatysady.

Forýmnyń maqsaty – turaqty ekonomıkalyq ósýge qol jetkizý, kóshi-qon protsesterin retteý jáne tsıfrlyq ortany damytý úshin Ortalyq Azııa elderi arasyndaǵy parlamentaralyq yntymaqtastyqty nyǵaıtý.

Qatysýshylar «Kóshi-qon jáne eńbek aǵyny: azamattardyń quqyqtaryn jáne ekonomıkalyq turaqtylyqty zańnamalyq qamtamasyz etý», «Ortalyq Azııa elderindegi ınvestıtsııalyq ahýaldy jaqsartý jáne ekonomıkalyq ashyqtyqty arttyrý boıynsha zańnamalyq sharalar», «Parlament jáne tsıfrlyq sýverenıtet: kıberqaýipsizdik, tsıfrlyq ortany retteý» sııaqty taqyryptardy talqylaıdy.

Eske sala ketsek, Ortalyq Azııa memleketteriniń birinshi Parlamentaralyq forýmy 2023 jyly Qazaqstanda ótti. Onda Senat spıkeri Ortalyq Azııa elderiniń parlamentaralyq forýmynda Aral máselesin kóterdi.